САЙЁР ҚАБУЛ
Фуқароларнинг суд-ҳуқуқ масалаларига доир мурожаатларини ўрганиш, уларни қийнаётган муаммоларни ижобий ҳал этишга кўмаклашиш. Айни мақсадда Наманган вилояти суди ва вилоятдаги ҳуқуқни муҳофаза қилувчи идоралар раҳбарлари иштирокида ўтказиб келинаётган сайёр қабулларнинг бу галгиси Наманган туманида бўлиб ўтди.
Тумандаги «Катта Тошбулоқ» маҳалласида ташкил этилган қабулларда Наманган вилояти суди раиси Алишер Усманов иштирок этиб, аҳоли вакилларининг суд тизимига доир мурожаатларини тинглади.
Сайёр қабулда 21 нафар фуқароларнинг жиноят, фуқаролик, иқтисодий ва маъмурий судларга оид мурожаатлари кўриб чиқилди. Уларнинг 17 тасига ҳуқуқий тушунтиришлар берилган бўлса, 4 та мурожаат шу ернинг ўзида ижобий ҳал этилди.
Қабул доирасида бўлиб ўтган жиноят ишлари бўйича Наманган тумани судининг сайёр суд мажлисида Пробация гуруҳи ҳисобида турувчи назорат остидаги шахсларнинг 9 нафари муддатидан илгари шартли равишда озод қилинди.