Матбуот хизмати – Наманган вилоят суди

ЭЪЗОЗ ВА ЭЪТИБОР УЧРАШУВИ

Бугун мамлакатимизда меҳнат фахрийларини эъзозлаш, уларга эътибор кўрсатиш эзгу анъанага айланди. Бунда эса давлатимиз раҳбари таъкидлаганидек, “Инсон қадри учун, инсон бахти учун биргаликда ҳаракат қилиш” мақсади мужассам. Судьялар олий кенгаши томонидан ҳам яхши ташаббусга қўл урилиб, узоқ йиллар суд тизимида самарали фаолият олиб борган фахрийларнинг ҳаёти ва фаолияти акс этган маънавий-маърифий тадбирлар, учрашувлар ўтказилмоқда.

9 май – Хотира ва қадрлаш куни арафасида Учқўрғон туманидаги 15-сонли умумтаълим мактабида бўлиб ўтган ана шундай тадбир таълим муассасасининг собиқ ўқувчиси, суд фахрийси Абдурасул Эрановнинг ибратли ҳаёт йўлига бағишланди.

Учрашувда Судьялар олий кенгаши, Наманган вилояти суди судьялари, суд ва прокуратура фахрийлари, туман раҳбарлари ва ёшлар иштирок этдилар.

Дастлаб меҳмонлар синф хонасида бўлиб, бу ерда собиқ ўқувчининг устозлари ва синфдошлари билан суҳбатлашдилар. Самимий мулоқотларда болалик чоғлари, мактаб даврлари эсга олинди.

Тадбирнинг асосий қисмида сўзга чиққан суд, прокуратура фахрийлари, судьялар Абдурасул Эрановнинг шонли ҳаёт йўли, ибратли фаолияти ҳақида сўзлаб бердилар. Устознинг бой тажрибаси барча судьялар учун ибрат мактаби, умр йўли эса ёшларга чин ҳавас эканлигини алоҳида таъкидладилар.

Юзма-юз мулоқотда йигит-қизлар мактабнинг собиқ ўқувчисига ўзларини қизиқтирган саволлар билан мурожаат қилдилар. Уларнинг саволларига ҳаётий мисоллар, амалиётда учрайдиган воқеа-ходисалар билан жавоб қайтарилгани ёшларни суд тизимига, судьяликка бўлган қизиқишини оширди.

Шу куни Судьялар олий кенгаши томонидан таълим муассасасига А.Эрановнинг меҳнат фаолияти акс этган махсус пешлавҳа тақдим этилди. Бу судьялар ҳамжамиятининг мазкур умумтаълим мактабига ҳурмат ва эҳтиром рамзи бўлиб, ушбу даргоҳдан яна кўплаб эл ардоғидаги инсонлар етишиб чиқишига билдирилган ишонч ҳам ҳисобланади.

Учрашувда мактаб жамоаси, ўқитувчи ва ўқувчиларга Судьялар олий кенгаши, вилоят суди ҳамда А.Эранов томонидан ташаккурнома ва эсдалик совғалари топширилди. Шу куни меҳмонлар мактаб ҳовлисига манзарали дарахт кўчатлари экиб, таълим муассасаси ободончилигига ўз ҳиссаларини ҳам қўшдилар.

СЕМИНАР-ТРЕНИНГ

Бугунги кунда рақамли технологияларнинг ривожланиши бир қатор қулайликларни яратиши билан бирга, айрим хавф-хатарларга, хусусан турли кибержиноятларга ҳам сабаб бўлмоқда.

Шу мақсадда жорий йилнинг 23-24 апрель кунлари Наманган вилоятида Европада хавфсизлик ва ҳамкорлик ташкилотининг (ЙХҲТ) Ўзбекистондаги ваколатхонаси, Судьялар олий кенгаши ва Судьялар олий мактаби томонидан “Кибержиноятлар бўйича рақамли далиллар билан боғлиқ ишларни самарали кўриб чиқиш” мавзусида тренинг ўтказилди.

Наманган вилояти судининг жиноят ишлари бўйича судлов ҳайъати, туман-шаҳар судлари судьялари иштирок этган тренингда кибержиноятлар бўйича рақамли далиллар билан боғлиқ ишларни самарали кўриб чиқиш, бу борадаги хорижий тажрибаларни амалиётда қўллаш, шунингдек трансмиллий суриштирувлар билан ишлаш кўникмаларини шакллантириш бўйича судьяларнинг малакаси оширилди.

Тренингда Ўзбекистон Республикаси Ҳуқуқни муҳофаза қилиш академияси мутахассислари томонидан “Ўзбекистон Республикасида кибержиноятчилик аҳволи”, “Кибержиноятчиликка қарши курашишнинг миллий-ҳуқуқий асослари”, “Ахборот технологиялари ёрдамида содир этиладиган жиноятлар юзасидан тўпланган рақамли далилларга тўғри баҳо бериш ва мақбуллигини таъминлаш” мавзуларида маърузалар қилиниб, иштирокчилар рақамли криминалистиканинг замонавий имкониятлари билан таништирилди. Тренинг якунида иштирокчиларга сертификатлар топширилди.

Давлатмирза Камилов,

Наманган вилояти судининг судьяси

СУД РАИСИ ЁШЛАР БИЛАН УЧРАШДИ

Ўзбекистон Судьялари Ассоциацияси ҳамда Наманган вилояти суди ташаббуси билан Ички ишлар вазирлигининг Наманган академик лицейида амалий Конференция ва ёшлар билан учрашув ўтказилди.

Дастлаб “Ўзбекистон – 2030” стратегиясини “Атроф-муҳитни асраш ва “яшил иқтисодиёт” йилида амалга оширишга оид давлат дастури ижроси юзасидан келиб чиқадиган вазифаларни судьялар фаолиятига татбиқ этиш бўйича ишлаб чиқилган алоҳида дастур бўйича сўз юритилди. Судьялар ушбу дастурда белгиланган муҳим вазифаларга тўхталиб, уларни амалга оширишга доир чора-тадбирлар ҳақида маълумот бердилар.

Шундан сўнг, Наманган вилояти суди раиси, суд фахрийлари ҳамда акдемик лицей ўқувчилари иштирокида “Судья ва ёшлар” учрашуви бўлиб ўтди.

Очиқ мулоқот, самимий суҳбат тарзида кечган учрашувда вилоят суди раиси Алишер Усманов, суд фахрийлари ўқувчилик ва талабалик йилларини эсга олиб, Янги Ўзбекистон ёшларига яратиб берилаётган бугунги шароитларни эътироф этдилар. Судьялик касбининг адолатни, инсон ҳуқуқ ва манфаатларини таъминлашдаги аҳамияти, келгусида мазкур тизимда фаолият олиб боришни истаган ёшлар мустаҳкам билим олишга интилиши, ўз устида ишлаши зарурлигини таъкидладилар.

Ички ишлар вазирлигининг Наманган академик лицейида таълим олаётган ўқувчилар орасида суд-ҳуқуқ соҳасига қизиқувчилар кўпчиликни ташкил этади. Айни жиҳатдан, юзма-юз мулоқотда йигит-қизлар ўзларини қизиқтирган саволлар билан меҳмонларга мурожаат қилдилар. Уларнинг саволларига ҳаётий мисоллар, амалиётда учрайдиган воқеа-ходисалар билан жавоб қайтарилгани бўлажак ҳуқуқшуносларни суд тизимига, судьяликка бўлган қизиқишини оширди.

Жонли мулоқотларга бой ўтган учрашув якунида вилоят суди раиси томонидан таълим муассасасига Наманган вилояти судларининг “Мозийга бир назар…” номли китоб-албоми совға қилинди.

Учрашувдан сўнг меҳмонлар академик лицейда ташкил этилган “Жасорат” музейида бўлдилар. Экскурсия давомида судья ва суд фахрийлари ички ишлар органларининг шонли тарихини акс эттирувчи манбалар, музей фондидаги нодир экспонатлар, тарихий ҳужжатлар ҳамда миллий меросга оид маълумотлар билан яқиндан танишдилар.

Айтиш жоизки, таълим муассасасида ташкил этилган “Судья ва ёшлар” учрашуви эртанги фаолиятини ҳуқуқни муҳофаза қилувчи идоралар, давлат ташкилотлари билан боғлаш ниятидаги кўплаб йигит-қизларга ўзига хос мотивация бўлди.

ҲАМКОРЛИКДАГИ ФАОЛИЯТ

Суд ҳужжатлари ижросини ўз вақтида таъминланиши фуқароларнинг судга бўлган ишончини мустаҳкамлаш ва уларнинг манфаатларини кафолатли ҳимоя қилишда муҳим ўринга эга.

Айни жиҳатдан, Наманган вилояти прокуратурасида ташкил этилган амалий семинар ҳам фуқаролик судлари ҳужжатлари ижросини ўз вақтида таъминлаш, бу борадаги ишлар самарадорлигини оширишга бағишланди.

Унда фуқаролик ишлари бўйича судларнинг судьялари, прокуратура ва мажбурий ижро бюроси ходимлари иштирок этдилар.

Мулоқотларда асосий эътибор суд қарорлари ижросини ўз вақтида таъминлаш, ижро ҳужжатларини қайтарилишига сабаб бўлаётган омилларни ўрганиш ва уларга барҳам беришга қаратилди.

Мазкур масалалар юзасидан судьялар, мажбурий ижро бюроси ходимларининг амалиётда учраётган ҳолатлар бўйича маърузалари эшитилди. Якунда ижро самарадорлигини ошириш, иш сифатини яхшилаш мақсадида ўзаро ҳамкорликни кучайтириш ҳамда суд қарорлари ижросини вақтида таъминланишига тўсиқ бўлаётган камчиликларни қонун доирасида бартараф этиш бўйича режалар белгилаб олинди.

КОРРУПЦИЯГА ҚАРШИ КУРАШ МАСАЛАЛАРИГА БАҒИШЛАНГАН ЙИҒИЛИШ

Коррупциядан ҳоли бўлган адолатли суд тизимини яратиш, одоб-ахлоқ қоидаларига риоя этиш, соҳада мавжуд тизимли хато ва камчиликларни бартараф этиш. Айнан шу масала Олий суд раисининг биринчи ўринбосари И. Муслимов Наманган вилояти судларининг судья ва ходимлари, шунингдек Судлар фаолиятини таъминлаш департаменти ҳудудий бўлими ходимлари иштирокида ўтказган учрашувнинг асосий мавзуи бўлди.

Мулоқотда Олий суд Кадрлар бошқармаси бошлиғи М. Мухитдинов, ҳудудларга бириктирилган Олий суд судьялари ва масъул ходимлари, Наманган вилоят судларининг судьялари ва ходимлари иштирок этди.

Учрашувда Давлатимиз раҳбари томонидан 5 март куни Коррупцияга қарши курашиш миллий кенгаши йиғилишида коррупциядан ҳоли бўлган адолатли суд тизими яратиш бўйича белгилаб берилган устувор вазифалар, шунингдек Олий суд раисининг тизимда коррупциянинг олдини олиш ва унга қарши муросасиз курашиш бўйича судья ва суд аппарати ходимларига йўллаган мурожаатида кўтарилган масалалар ижросини тўлиқ, ўз вақтида ва сифатли таъминлаш юзасидан кўрилаётган чоралар муҳокама қилинди.

Шу билан бирга, йиғилиш давомида маъмурий ҳуқуқбузарликка оид, коррупциявий характерга эга бўлган жиноят ишларини кўриш ва жазо тайинлашда, хусусан коррупцион жиноятни содир этганликда айбланган шахсни лавозимдан четлаштириш масалаларида, шунингдек, фуқаролик, иқтисодий ва маъмурий судлар томонидан ишларни кўришда йўл қўйилаётган хато ва камчиликлар аниқ мисоллар асосида танқидий таҳлил қилиниб, бунда коррупциявий омилларнинг олдини олишга қаратилган тегишли тавсиялар берилди.

Поп туманида Наманган вилояти суди ҳамда вилоят маъмурий суди раислари иштирокида сайёр қабул ўтказилди

КОРРУПЦИЯ – ИЛЛАТ!

Ўзбекистон Республикаси Судьялар олий кенгаши раиси Холмўмин Ёдгоров Наманган вилоятида бўлиб, судьялар ва уларнинг оила-аъзолари билан учрашув ўтказди.

Коррупцияга қарши кураш масалаларига бағишланган учрашувда дастлаб Судьялар олий кенгаши томонидан тайёрланган судья қандай бўлиши лозимлиги ҳамда айрим коррупцияга йўл қўйган собиқ судья ва ходимларнинг пушаймонлиги акс этган видеолавҳа намойиш этилди. Ушбу фильм бугунги кундаги долзарб муаммолардан бўлган порахўрлик ва унга қарши курашиш, коррупциянинг аянчли оқибатларига бағишланган бўлиб, унда таъмагирлик оқибатида ўз иши ва виждонига хиёнат қилган, охир-оқибат бу қилмиши орқали жиноятчига айланган давлат хизматчиларининг аянчли қисмати акс этган.

Фильм намойишидан сўнг Судьялар олий кенгаши раиси Холмўмин Ёдгоров кейинги йилларда Ўзбекистон Республикаси Президенти томонидан судьяларнинг чинакам мустақиллигини таъминлаш, тизимда коррупцион омилларни баратаф этиш бўйича қатор ҳужжатлар қабул қилингани, айниқса, давлатимиз раҳбари суд ишларига ҳеч ким аралашмасин, деб уқтирганларини, ҳақиқатдан ҳам суд мустақил ва холис бўлгандагина адолат қарор топишини, шунинг учун ҳам аввало судьяларимиз ўз ишларига бошқаларнинг аралашувига йўл қўймасликлари лозимлиги, агарда турли аралашув ёки босимлар юз берган тақдирда, албатта кенгашга маълум қилиниши шартлиги ҳақида таъкидлаб ўтди.

Бу борада Президентимизнинг Коррупцияга қарши курашиш бўйича миллий кенгаш йиғилишида суд тизимида коррупциявий хавф-хатарларни олдини олиш, одил судлов сифати ва самарадорлигини ошириш доимо диққат марказида бўлиши зарурлигини таъкидлаганлари барча судьялар ҳамжамиятини порахўрлик иллатига қарши курашда бирдам бўлишга чақириши кераклиги айтиб ўтилди.

Шунингдек, тадбирда судьянинг оиласи, ота-онаси, турмуш ўртоғи ва фарзандлари ҳам камтар, одобли бўлишдан ташқари доимо судьянинг молиявий ҳолатини, у ва оиласининг ҳалол ризқланишини ҳамда ортиқча дабдабабозликка берилмаслигини назорат қилиб туриши ҳам катта аҳамиятга эга эканлиги қайд этилди.

Мулоқотда вилоят суди фахрийлар кенгаши раиси Ғозихон Яхёхўжаев, суд раислари сўзга чиқиб касбга садоқат, ҳалол-поклик тўғрисида ўз фикр-мулоҳазаларини билдирдилар.

ҚАДРИЯТЛАРИНГ БОҚИЙ БЎЛСИН, НАВРЎЗ!

Наманган вилояти судида Наврўз умумхалқ байрами муносабати билан тадбир ўтказилди.

Судьялар ва тизим ходимлари, ота-оналар иштирок этган тадбирда Наманган вилояти суди раиси Алишер Усманов барчани яшариш ва янгиланиш айёми билан табриклаб, эзгу тилаклар билдирди.

Шундан сўнг бир гуруҳ судья ва ходимлар, уларнинг ота-оналарига вилоят суди раисининг фахрий ёрлиқ, ташаккурнома ва эсдалик совғалари топширилди.

Вилоят суди томонидан Наврўз умумхалқ байрамига бағишлаб спортнинг шахмат ва шашка турлари бўйича мусобақалар ўтказилган эди. Байрам тадбирида мазкур беллашувларда ғолиб бўлган судья ва суд ходимлари диплом ва медаллар билан тақдирланди.

Тадбирда шунингдек, навбатдаги мансаб даражалари берилган суд ходимлари эълон қилиниб, муборакбод этилди.

КОРРУПЦИЯГА ҚАРШИ КУРАШ УСТУВОР ВАЗИФА

Давлатимиз раҳбарининг 2025 йил 5 март кунги Коррупцияга қарши курашиш бўйича миллий кенгаш йиғилишидаги нутқида коррупция ислоҳотлар йўлида энг катта тўсиқ ва ғов эканлиги таъкидланиб, сўнгги йилларда бу иллатга қарши курашиш бўйича янги тизим яратилганлиги, Парламент палаталарида масъул қўмиталар, Коррупцияга қарши курашиш миллий кенгаши ва Агентлик ташкил қилинганлиги таъкидланди.

Шунингдек, аҳоли ва тадбиркорларга “ҳалқ хизматидаги давлат” тамойили асосида хизмат кўрсатиш йўлга қўйилганлиги, 120 турдаги ҳужжатларни талаб қилиш, 160 дан ортиқ лицензия ва рухсатномалар бекор қилинганлиги, электрон давлат хизматлари сони 15 карра ортганлиги, бунинг натижасида аҳоли, тадбиркорлар, хорижий инвесторларнинг ислоҳотларга ишончи мустаҳкамланганлиги, мамалакатимиз иқтисодиёти 2 карра ўсиб, ўтган йили 115 миллиард долларга етгани келтириб ўтилди.

Коррупциянинг олдини олиш – давлат хизматига профессионал ва фидойи кадрларни танлаш ҳамда уларни “ҳалоллик вакцинаси” билан эмлашдан бошланиши, шу боис ишга олишдаги тартиб ва ёндашувларни такомиллаштириш зарурлиги, фикри тоза, коррупцияга тоқатсиз янги авлодни тарбиялаш мақсадида таълим масканларида ҳалоллик ғояларини сингдириш, уларнинг ташаббусларини қўллаб-қувватлаш муҳимлиги, коррупцияга қарши курашиш умуммиллий вазифа, ҳар бир ватанпарвар юртдошимизнинг виждон иши экани таъкидланди.

Суд тизимида коррупциявий хавф-хатарларни олдини олиш, одил судлов сифати ва самарадорлигини ошириш доимо диққат марказида бўлиши зарурлиги, сўнгги йилларда судлар мустақиллигини таъминлаш бўйича катта ислоҳотлар амалга оширилганлиги, лекин судьяларни мажлисга чақириш, уларга ваколатига кирмайдиган вазифаларни юклаш ҳолатлари ҳам учраб тургани, айрим идоралар томонидан судга таъсир ўтказишга уринишлар ҳали-ҳануз давом этаётгани, судлар фаолиятига ҳар қандай аралашиш одил судловга соя солиш, деб баҳоланиши, бу бўйича сўров ҳам, жавобгарлик ҳам қаттиқ бўлиши қайд этилди.

Президентимизнинг нутқидан келиб чиқиб Олий суд раиси Б.Исламов барча судьялар ва суд аппарати ходимларига мурожаатнома йўллаб, унда суд тизимини ҳалол, пок кадрлар билан тўлдириш, уларнинг касбий малакасини ошириб бориш, суд ҳокимиятининг мустақиллиги принципига риоя қилиш лозимлигига эътибор қаратди. Бу борада судларни моддий-техника жиҳатидан ва молиявий таъминлаш масалаларига алоҳида эътибор қаратилаётганлиги, тизимда замонавий ахборот технологиялари кенг жорий этилгани ҳолда, коррупциявий хавф-хатарларни камайтириш ва инсон омилини сезиларли даражада қисқартиришга эришиб келинаётганлигини таъкидланди.

Биз судьялар Президентимизнинг нутқи ва Олий суд раисининг мурожаатномасига жавобан келгусидаги фаолиятимизда суд тизимида коррупциявий хавф-хатарларнинг олдини олиш ва буларга муросасиз муносабатда бўлиш, суд тизимида ҳалоллик ва покликни таъминлаш, судларда ишларнинг ўз вақтида кўрилиши ҳамда қонуний ва адолатли қарорлар қабул қилган ҳолда суд тизими обрўсини янада оширишда бор куч-ғайратимиз билан меҳнат қилишимиз лозим. Айни жиҳатдан, Президент нутқи ҳамда Олий суд раисининг мурожаатномаси юзасидан вилоят судларида коррупцияга қарши муросасиз курашиш юзасидан суҳбатлар ўтказилиб, тегишли чора-тадбирлар ишлаб чиқилмоқда.

Қодирхон Ходжаев

Наманган вилояти судлари

Судьялари малака ҳайъати

раиси ўринбосари

ОБОДЛИК КЎНГИЛДАН БОШЛАНАДИ

Наманган вилояти судида Наврўз умумхалқ байрами олдидан ободонлаштириш ва кўкаламзорлаштириш тадбирлари ўтказилди.

Эрта тонгдан судья ва тизим ходимлари вилоят суди ҳовлиси ва атрофини саранжом-саришта ҳолатга келтирдилар. Дарахтлар оқланиб, шакл берилди. Манзарали дарахт ва гул кўчатлари экилди. Атроф-муҳит турли чиқиндилардан тозаланиб, ободонлаштирилди.

Бу каби ободлик тадбирлари барча судлов ҳайъатлари ҳамда шаҳар ва туман судларида ҳам уюшқоқлик билан ўтказилди.