ҚАДРДОН МАСКАНДАГИ УЧРАШУВ

Наманган вилояти суди раиси Алишер Усманов Чуст туманидаги ўзи таълим олган 42-сонли ихтисослаштирилган мактаб-интернатида бўлиб, ўқувчи-ёшлар билан учрашди.

1 октябрь – Ўқитувчи ва мураббийлар куни олдидан ташкил этилган йўқлов тадбирида Устозлар, вилоят суди раиси билан бирга ўқиган синфдошлар жам бўлдилар. Мулоқотларда ўқувчилик йиллари ёдга олиниб, болалик хотиралари эсланди. Барча муваффақиятларнинг калити илм-маърифат экани таъкидланиб, ёшларга билим олишдан асло тўхтамаслик бўйича тавсиялар берилди.

Шундан сўнг вилоят суди раиси мактаб жамоасига Наманган вилояти судлари тарихига бағишлаб чоп этилган “Мозийга бир назар…” номли китоб-албом ҳамда бадиий адабиётлар тўпламини совға қилди. Таълим-тарбия соҳасига муносиб ҳисса қўшиб келаётган ўқитувчилар, фаол ва ташаббускор ўқувчиларга вилоят судининг ташаккурномалари ҳамда эсдалик совғалари топширилди.

Мактаб-интернатнинг собиқ ўқувчилари билан бўлиб ўтган мазкур учрашув эртанги фаолиятини ҳуқуқни муҳофаза қилувчи идоралар, давлат ташкилотлари билан боғлаш ниятидаги кўплаб ўғил-қизларга ўзига хос мотивация бўлди.

ЭЪЛОН!

Наманган вилояти суди, туман (шаҳар), туманлараро судларининг суд аппарати ходими лавозими захирасига номзодларни олиш бўйича танлов эълон қилинади.


Танловда олий ва ўрта махсус ўқув юртларини юриспруденция йўналиши бўйича тамомлаган мутахассислар иштирок этишлари мумкин.


Номзодлар аризага маълумотнома (объективка) ва яқин қариндошлари тўғрисидаги маълумотнома, диплом, (чет элда ўқиганлиги тўғрисидаги дипломга эса, диплом тан олинганлиги ва нострификация қилинганлигини тасдиқловчи гувоҳнома) паспорт ҳамда меҳнат дафтарчаси нусхаларини илова қилган ҳолда 2024 йил 4 октябрь кунига қадар вилоят судининг Кадрлар бўлимига мурожаат этишлари мумкин.


Изоҳ: Бугунги кунда жиноят ишлари бўйича Наманган, Уйчи, Учқўрғон, Норин, Косонсой, Чуст, Мингбулоқ, Тўрақўрғон ва Наманган шаҳар судларида, шунингдек, фуқаролик ишлари бўйича Наманган, Учқўрғон, Янгиқўрғон туманлараро судларида судья ёрдамчиси, девонхона мудири ва архивариус лавозимлари бўйича бўш иш ўринлари мавжуд.


Манзил: Наманган шаҳри, Н.Номонгоний кўчаси, 10-уй.

ҚАДРДОН МАСКАНГА ТАШРИФ

Наманган вилояти суди раиси Алишер Усманов Чортоқ туманидаги ўзи ўқиган мактабларга ташриф буюриб, ўқувчи-ёшлар билан учрашди.

Дастлаб 11-сонли умумтаълим мактабида бўлган вилоят суди раиси таълим муассасасида ўтган ўқувчилик йилларини эслаб, билим берган Устозларини, синфдошларини ёдга олди. Ўша пайтлардаги шароитлару бугунги ёшларга, таълим-тарбияга берилаётган эътибор хусусида фикр билдириб, юртимизда ўқийман деган ҳар бир ёш учун барча имкониятлар етарли эканини таъкидлади. Бунинг учун эса билим олишга бефарқ бўлмаслик, кўп китоб ўқиш кераклигини айтиб ўтди. Мактаб жамоасига Наманган вилояти суди томонидан нашр этилган судлар тарихига бағишланган “Мозийга бир назар…” номли китоб-албом ҳамда бадиий адабиётлар тўплами совға қилинди. Таълим-тарбия соҳасига муносиб ҳисса қўшиб келаётган ўқитувчиларга вилоят судининг ташаккурномалари топширилди. Энг асосийси, вилоят суди раисининг ташаббуси билан тез кунларда мактаб ҳовлисини ободонлаштириш ва тадбирлар ўтказиладиган майдончани асфалтлаш бўйича режалар белгилаб олинди.

Кейинги манзил вилоят суди раиси бошланғич таълим олган 49-сонли умумтаълим мактаби бўлди. Қадрдон синфдошлар, мактаб жамоаси ва ўқувчилар жам бўлган учрашув, интилганга ҳамиша толе ёр эканлигининг амалий ифодаси бўлди. Боиси, бундан 53 йил олдин айни шу мактабда илк бор ўқиш-ёзишни ўрганган собиқ ўқувчи бугун нуфузли идораларда раҳбарлик лавозимларида фаолият олиб бораётганини ёшлар ўз кўзлари билан кўрдилар. Вилоят суди раиси мазкур таълим даргоҳи жамоасига ҳам “Мозийга бир назар…” номли китоб-албом, бадиий адабиётлар тўплами ва замонавий телевизор совға қилди. Фаол ўқитувчиларга эса ташаккурнома ва эсдалик совғалари топширилди.

Шундан сўнг вилоят суди раиси мактабнинг 9-синф ўқувчиларига “Бир бўлсак – ягона халқмиз, бирлашсак – Ватанмиз” шиори остида “Мустақиллик дарслари”ни ўтиб берди.

УЧ АВЛОД УЧРАШУВИ

Наманган вилояти судида Ўзбекистон Республикаси Давлат мустақиллигининг 33 йиллиги муносабати билан “Уч авлод учрашуви” ўтказилди.

Умрини эл-юрт хизматига бахшида этган инсонларнинг хотираси абадий, қадри муқаддас. Улар гарчи орамизда бўлмасалар ҳам босиб ўтган умр йўллари, қолдирган эзгу амаллари кўплар учун ибрат мактабидир. Шу маънода мазкур тадбир турли йилларда вилоят суд идораларида фаолият олиб борган марҳум судьялар хотирасига бағишланди. Учрашувга уларнинг оила-аъзолари, шогирдлари, ҳамкасблари таклиф этилдилар.

Наманган вилояти суди раиси Алишер Усманов ўтганларни ёд этиб, уларнинг эзгу фазилатлари, судьялик касбига бўлган садоқатларини хотирлади. Ўтганлар хотирасига бағишланган видеоролик намойиши эса барча тадбир иштирокчиларининг қалб тубларида ётган ҳис-туйғуларини жунбушга келтириб, дилларидаги хаяжонларини тилларига кўчирди. Сўзга чиққанлар ота-оналари, ака-укалари, ўғил-қизлари билан боғлиқ ширин хотираларни эсладилар. Яқинларига кўрсатилган бундай эҳтиромдан миннатдор эканликларини билдирдилар.

Тадбирда сўз олган фахрийлар кейинги йилларда мамлакатимизда суд идоралари ҳамда судьяларга қаратилаётган эътибор хусусида гапириб, мазкур жараёнларда айниқса, тизимда кўп йиллар меҳнат қилган фахрийларни қўллаб-қувватлаш борасида ижобий ишлар олиб борилаётганини таъкидладилар. Бугунги “Уч авлод учрашуви”, хотира тадбири ҳам бунинг ёрқин ифодаси эканлигини айтиб ўтдилар.

Шундан сўнг, тадбир иштирокчиларининг ҳар бирига Наманган вилояти суди томонидан нашр этилган вилоят судлари тарихига бағишлаб ёзилган “Мозийга бир назар…” номли китоб-альбом совға қилинди.

Тантанали тадбирда шунингдек, узоқ йиллар суд тизимида самарали фаолият олиб бориб, кўплаб шогирдлар тарбиялаган, айни кунларда қутлуғ 60 ёшни қарши олган Нурилло Аббосовга вилоят суди раисининг табриги ўқиб эшиттирилиб, муборакбод этилди.

Уч авлод вакилларини бирлаштирган учрашувнинг яна бир аҳамиятли жиҳати тадбирда бу йил Наманган вилоятидан Судьялар олий мактабига ўқишга қабул қилинган 12 нафар ёшларга оқ йўл тиланди. Улар суд дарғалари, марҳум судьяларнинг оила-аъзолари, ҳамкасблари даврасида эзгу ниятлар билан судьялик сари илк қадамларини ташладилар.


НАМАНГАН ВИЛОЯТИ СУДИ АХБОРОТ ХИЗМАТИ

ОБОДЛИК КЎНГИЛДАН БОШЛАНАДИ

Республикамизнинг барча ҳудудларида, давлат ва жамоат ташкилотларида бўлгани каби Наманган вилояти судида ҳам “Маҳалла обод – юрт обод!” шиори остида умумхалқ хайрия ҳашари ўтказилмоқда.

Бугун эрта тонгдан судья ва суд ходимлари озодалик ва поклик тадбирларида иштирок этиб, юртимиз ободлигига ўз ҳиссаларини қўшмоқдалар.

Умумхалқ хайрия ҳашари вилоятдаги барча судлов ҳайъатлари, туман ва шаҳар судларида уюшқоқлик билан ўтказилмоқда.

АҲОЛИ МУРОЖААТЛАРИ ЎРГАНИЛДИ

Жисмоний ва юридик шахсларнинг мурожаатларини ўрганиш ва уларга ижобий ечим топиш мақсадида жойларда ташкил этилаётган оммавий сайёр қабулларнинг навбатдагиси Наманган туманининг «Миришкор» маҳалласи ҳудудида бўлиб ўтди.

Суд ва ҳуқуқни муҳофаза қилувчи органлар раҳбарлари иштирокида ўтказилган қабулларда фуқаролар ўзларини ўйлантираётган муаммо ва масалалар бўйича мурожаат қилдилар. Хусусан, шу куни вилоят суди раиси Алишер Усманов ҳамда вилоят маъмурий суди раиси Зарипахон Қурбонова аҳоли вакилларининг суд-ҳуқуқ йўналишига доир 17 та мурожаатларини ўргандилар. Уларнинг 8 таси шу ернинг ўзида ижобий ҳал этилган бўлса, қолганларига ҳуқуқий тушунтиришлар берилди.

Сайёр қабул доирасида бўлиб ўтган жиноят ишлари бўйича Наманган тумани судининг сайёр суд мажлисида маъмурий органлар томонидан чиқарилган қарорлар юзасидан келтирилган шикоятлар кўриб чиқилиб, аризалар қаноатлантирилди.

КИТОБ – МАЪНАВИЯТ КЎЗГУСИ

Наманган вилояти судида “Китоб – маънавият кўзгуси” танлови ўтказилди. Суд тизимида “Коррупциясиз соҳа” лойиҳасини амалга ошириш доирасида ташкил этилган мазкур танлов судья ва суд ходимларининг маънавияти ва дунёқарашини юксалтириш, улар ўртасида китобхонлик маданиятини кенг оммалаштириш, китоб ўқишга бўлган қизиқиш ва интилишларини қўллаб-қувватлашга қаратилди.

Мазкур танловда Наманган вилояти суди ҳамда вилоят маъмурий судидан 30 нафар судья ва суд ходимлари иштирок этдилар.

Танловда иштирокчиларнинг китобхонлик маданияти икки шарт бўйича баҳоланди. Биринчи шартда судья ва суд ходимлари ўзбек ва жаҳон адабиёти ёзувчилари асарларининг мазмун-моҳияти, ғояси ва аҳамиятини шарҳлаб бердилар. Иккинчи шартда китобхонлар коммиссия аъзолари томонидан тузиб чиқилган саволларга тезкор тарзда жавоб бериш билан ўз қобилиятларини намойиш этдилар.

Ҳакамлар ҳайъати томонидан ҳар бир иштирокчининг бадиий асар ҳақидаги нутқи, саволларга тўғри ва тўлиқ жавоб бериши адолатли тарзда баҳолаб борилди.

Танлов ғолиблари мустақиллигимизнинг 33 йиллик байрам шодиёналари арафасида эълон қилиниб, вилоят судининг диплом ва эсдалик совғалари билан тақдирланади.

ЯРИМ ЙИЛЛИК ФАОЛИЯТ ТАҲЛИЛ ҚИЛИНДИ

Наманган вилояти судида 2024 йилнинг биринчи ярмида одил судловни амалга ошириш борасидаги фаолият якунлари ҳамда келгусидаги вазифалар муҳокамасига бағишланган Раёсат мажлиси бўлиб ўтди. Унда вилоят судининг жиноят, фуқаролик, иқтисодий судлов ҳайъати, туманлараро, туман (шаҳар) судлари судьялари иштирок этдилар.

Наманган вилояти суди раиси Алишер Усманов раислик қилган йиғилишда дастлаб Ўзбекистон Республикаси Президентининг 2024 йил 10 июндаги “Тезкор-қидирув ҳамда тергов фаолиятида шахснинг ҳуқуқ ва эркинликларини ишончли ҳимоя қилиш кафолатларини янада кучайтириш чора-тадбирлари тўғрисида”ги Фармони мазмун-моҳиятига тўхталиб ўтилди. Мазкур ҳужжат судлар фаолияти самарадорлигини ошириш, ишни судга қадар юритишда тарафларнинг тенглиги ва тортишуви принципини амалда таъминлаш, шунингдек, тезкор-қидирув ҳамда тергов фаолиятида шахснинг ҳуқуқ ва эркинликларини самарали ҳимоя қилинишида муҳим эканлиги таъкидланди.

Шундан сўнг, Наманган вилояти судининг жиноят, фуқаролик, иқтисодий судлов ҳайъати, туманлараро, туман (шаҳар) судларининг 2024 йил биринчи ярмида одил судловни амалга ошириш борасидаги фаолияти танқидий таҳлил қилинди. Хусусан, вилоят суди раиси ҳамда ўринбосарлар томонидан жорий йилнинг ўтган 6 ойи давомида кўрилган жиноят, фуқаролик, иқтисодий ишлар таҳлили, жисмоний ва юридик шахслардан келиб тушган мурожаатлар ҳолати, ижро ва меҳнат интизоми ҳамда ҳуқуқий тарғибот ишлари кенг муҳокама қилиниб, бу борада йўл қўйилган камчиликлар танқид остига олинди. Уларни бартараф этиш бўйича мутасаддиларга тегишли кўрсатма ва топшириқлар берилди.

Йиғилишда шунингдек, суд тизимида коррупциянинг олдини олиш ва мазкур иллатга қарши муросасиз муносабатда бўлиш борасида ҳам сўз юритилиб, бугун ҳар бир судья ва суд ходими яратиб берилаётган имконият ва шароитларга жавобан ўз ишига виждонан ёндошиши кераклиги, бунинг учун эса энг аввало коррупцион ҳолатларга йўл қўймаслиги, фидойилик ва ватанпарварликда ҳаммага намуна бўлиши лозимлиги таъкидланди.

Наманган вилояти суди ахборот хизмати

Skip to content