ҲАМКОРЛИКДАГИ ФАОЛИЯТ
Наманган вилояти судининг жиноят ишлари бўйича судлов ҳайъати томонидан вилоят ички ишлар бошқармасида тергов сифатини янада яхшилаш масалаларига бағишланган ўқув семинар машғулоти ўтказилди.
Ички ишлар идораларининг терговчилари, прокуратура, божхона идоралари ходимлари иштирок этган семинарда Наманган вилояти суди раисининг ўринбосари Адҳамжон Мирзаев жорий йилнинг ўтган даври мобайнида дастлбаки тергов органлари томонидан тақдим этилган ҳужжатларда аниқланган камчиликларга тўхталиб ўтди. Маъмурий материаллар ва жиноят ишларини судларда кўриш жараёнидаги айрим муаммолар таҳлил этилиб, мавжуд камчиликларни бартараф этиш, янги қонунларни қўллашда юзага келиши мумкин бўлган тушунмовчиликларнинг олдини олиш ва тергов жараёнида фуқароларнинг ҳуқуқларини тўлиқ таъминлаш масалаларига эътибор қаратилди.
Семинарда судьялар Ш.Қурбонов, Д.Тожибоев, Э.Абдуллаев, Қ.Алижонов амалиётда учраётган айрим камчиликлар ҳақида гапириб, уларни бартараф этиш бўйича ўз фикрларини билдирдилар.
Якунда мавзу юзасидан таклиф ва мулоҳазалар эшитилиб, иштирокчилар томонидан берилган саволларга батафсил жавоблар қайтарилди.
Наманган вилояти судининг жамоатчилик ва ОАВ билан алоқалар бўлими