АЁЛЛАРГА ЭЪТИБОР

Ўзбекистон Республикаси Судьялар олий кенгаши ҳузурида Судьялар клуби фаолияти йўлга қўйилган бўлиб, у орқали аёл судьяларни бирлаштириш ва уларга мулоқот майдонини ташкил этиш имкониятлари яратилган.

Бугун Судьялар олий мактабида мазкур клубнинг йиғилиши бўлиб ўтди. Видеоконференцалоқа шаклида барча ҳудудларга уланган тадбирда Судьялар клуби томонидан амалга оширилаётган ишлар, аёл судьялар фаолияти, уларни қўллаб-қувватлаш борасидаги вазифалар ҳақида сўз борди.


Тадбирда одил судловни амалга ошириш, судларга бўлган ишончни мустаҳкамлаш, ёш судья кадрларни етиштиришдаги улкан хизматлари учун устоз судьялар ҳамда судьяларнинг ота-оналари Судьялар олий кенгашининг ташаккурнома ва эсдалик қўл соатлари билан тақдирландилар.

Хусусан, мазкур эътирофга Наманган вилоятидан айни пайтда Андижон вилояти фуқаролик ишлари бўйича Бўстон туманлараро судининг судьяси бўлиб фаолият олиб бораётган наманганлик Муҳайё Дедамирзаеванинг онаси Ойшахон Аҳмадалиева ҳамда фуқаролик ишлари бўйича Чуст туманлараро судининг раиси Иқболхон Кўчкинова лойиқ кўрилдилар. Наманган вилояти суди раиси Алишер Усманов мукофотланганларни муборакбод этиб, уларга ташаккурнома ва эсдалик қўл соатини топширди.

Бу каби эътибор судьяларнинг ўз вазифаларига бўлган масъулиятларини янада ошириб, самарали фаолиятларида муносиб рағбат бўлади.       

СУД ҲУЖЖАТЛАРИГА БАҲО БЕРИШНИНГ ЯНГИ ТИЗИМИ

Маълумки, одил судлов сифати суд ҳужжатларининг қонуний, асосли ва адолатлилиги билан чамбарчас боғлиқ. Агар суд томонидан иш якунида қабул қилинган ҳужжатга нисбатан норозилик туғилса ва бу бўйича шикоят қилинса, унга юқори турувчи суд инстанциясида қонуний баҳо берилади. Бу бир тарафдан, инсон ҳуқуқ ва эркинликларининг суд томонидан ҳимояланишини англатса, иккинчи томондан, процессуал қонунчиликда белгиланган тартибда юқори турувчи босқич судлари томонидан қуйи судларда қабул қилинган суд ҳужжатларининг қайта кўриб чиқилишини англатади.

Шу маънода суд ҳужжатларини қайта кўриб чиқиш институтини янада такомиллаштириш нафақат процессуал қонунчилик, балки фуқаро ва тадбиркорларнинг ҳуқуқ ҳамда қонуний манфаатларини ҳимоя қилишда ҳам муҳим аҳамиятга эга.

Ишларни кўришда ўрта бўғин судлари имкониятларидан янада самарали фойдаланиш, фуқароларнинг олис ҳудудлардан судга келиб овора бўлишининг олдини олиш мақсадида шу йил 1 январдан бошлаб, судлар, шу жумладан, маъмурий судларда суд ҳужжати устидан шикоят қилишнинг янги тартиби — ишларни тафтиш тартибида кўриб чиқиш институти жорий этилди.

Эндиликда тафтиш тартибидаги шикоятлар Қорақалпоғистон Республикаси маъмурий суди, вилоятлар ва Тошкент шаҳар маъмурий судлари, Ҳарбий суд томонидан, уларнинг тафтиш тартибида қабул қилган суд ҳужжатларидан норози бўлиб келтирилган шикоятлар эса, Олий суднинг Маъмурий ишлар бўйича судлов ҳайъати томонидан кўриб чиқилади.

Шунингдек, Олий суднинг Маъмурий ишлар бўйича судлов ҳайъатида тафтиш тартибида кўрилган ишлар бўйича суд ҳужжатлари устидан манфаатдор шахсларнинг мурожаатига асосан Олий суд раиси ёҳуд Бош прокурор томонидан тафтиш тартибида протест келтирилиши мумкин ва тафтиш тартибидаги ушбу протест Олий суднинг Раёсатида кўпчилик таркибда кўриб чиқилади. 

Қонунчиликда суд ишни тафтиш тартибида кўриш чоғида қуйи инстанция судлари томонидан моддий ҳуқуқ нормалари тўғри қўлланилган ва процессуал қонун талабларига риоя этилганини иш материаллари бўйича текшириши белгиланган.

Қонунчиликка киритилган ўзгартиришлардан яна бири ишни апелляция ва кассация тартибида биринчи инстанция судида иш юритиш қоидалари бўйича кўриши, юқори инстанция судлари томонидан ишларни янгидан кўриш учун биринчи инстанция судига юбориш тартиби бекор қилинишидир. Бундай тартиб фуқаро ва юридик шахсларнинг судларга бўлган ишончини янада ошишига хизмат қилади. Чунки бунга қадар биринчи инстанция судлари томонидан ишда иштирок этишга жалб қилинмаган шахсларнинг ҳуқуқ ва мажбуриятлари тўғрисида ҳал қилув қарори қабул қилингани ҳал қилув қарорини бекор қилиш ва ишни янгидан кўриш учун юборишга асос бўлар эди. Қонунчиликка киритилган янги ўзгартиришга кўра, эндиликда биринчи инс­танция судлари томонидан мазкур процессуал хатоликка йўл қўйилгани аниқланганда, юқори турувчи судлар ишларни янгидан кўриш учун биринчи инстанция судига юбормай, ишни биринчи инстанция судида иш юритиш қоидалари бўйича апелляция ёки кассация тартибида ишга жалб қилинмаган шахсларнинг иштирокини таъминлаган ҳолда кўриб чиқиб, тегишли қарор қабул қилиши мумкин.

Шу ўринда қуйидаги таклифни билдирмоқчиман. Яъни қонунчиликда белгиланган тафтиш тартибида ишни кўриш доирасини янада кенгайтириб, тафтиш инстанциясида ишларни кўришда қуйи инстанция судлари томонидан моддий ҳуқуқ нормалари тўғри қўлланилгани ва процессуал қонун талабларига риоя этилганини иш материаллари ва янги аниқланган далиллар бўйича текширишнинг аниқ тартиби белгиланса, мақсадга мувофиқ бўларди. Чунки Маъмурий суд ишларини юритиш тўғрисидаги кодекснинг 266-6-моддасида суд ишни тафтиш тартибида кўриш чоғида қуйи инстанция судлари томонидан моддий ҳуқуқ нормалари тўғри қўлланилгани ва процессуал қонун талабларига риоя этилганини иш материаллари бўйича текшириши белгиланган.

Шунингдек, ушбу кодекснинг янги таҳрирда баён қилинган 244-моддаси 4-қисми 2-бандида ишнинг суд мажлиси жойи ва вақти тўғрисида тегишли тарзда хабардор қилинмаган бирор-бир ишда иштирок этувчи шахс йўқлигида кўрилгани, 3-бандида суд томонидан ишда иштирок этишга жалб қилинмаган шахсларнинг ҳуқуқ ва мажбуриятлари тўғрисида ҳал қилув қарори қабул қилингани биринчи инстанция суди ҳал қилув қарорининг ҳар қандай ҳолда бекор қилиниши учун асос бўлиши кўрсатилган.

Шу боис қонунчиликка биринчи инстанция судларида ишни кўришда учинчи шахс­ларни жалб қилишни мажбурий шарт сифатида белгилаш мақсадга мувофиқ бўлар эди.

Таклиф этилаётган ўзгартиш ва қўшимчалар келгусида фуқароларнинг Конституциямизда назарда тутилган суд орқали ҳимояланиш ва судга шикоят қилиш ҳуқуқи кафолатларини янада кенгайтириш, уларнинг бузилган ҳуқуқлари ва эркинликлари, шунингдек, қонуний манфаатларини ишончли ҳимоя этиш, одил судловга эришиш даражасини янада ошириш, ишларнинг сифатли ва ўз вақтида кўрилишини таъминлаш, суд қарорларини қайта кўришда ўрта бўғин — вилоят ва унга тенглаштирилган судлар имкониятларидан самарали фойдаланишга хизмат қилиши шубҳасиз.

Умида НИШОНОВА,

Наманган вилояти маъмурий суди судьяси

СУДЛАР ФАОЛИЯТИ САРҲИСОБИ

Наманган вилояти судида вилоят судларининг 2023 йилдаги фаолият якунлари ҳамда одил судловни таъминлаш, фуқароларнинг ҳуқуқ ва эркинликлари, қонуний манфаатларини ҳимоя қилиш борасида амалга оширилган ишлар таҳлилига бағишланган матбуот анжумани ўтказилди.

Оммавий ахборот воситалари вакиллари, ахборот хизматлари раҳбарлари, журналист ва блогерлар иштирок этган анжуманда Наманган вилояти суди ҳамда вилоят маъмурий суди раислари томонидан суд-ҳуқуқ соҳасидаги ислоҳотлар, қонунчиликдаги янгиликлар, 2023 йил давомида кўрилган жиноят, фуқаролик, иқтисодий ҳамда маъмурий ишлар, жисмоний ва юридик шахслардан келиб тушган мурожаатларнинг таҳлили, ҳуқуқий тарғибот ишлари ҳамда соҳага оид бошқа маълумотлар ҳақида ахборотлар очиқланди.

Наманган вилояти суди раиси Алишер Усманов сўнгги йиллардаги суд-ҳуқуқ ислоҳотларига тўхталар экан, 2016-2023 йиллар давомида мазкур йўналишда 50 дан ортиқ қонун, фармон ва қарорлар қабул қилингани, бу ўз навбатида судларнинг чинакам мустақиллигини таъминлаш, одил судлов сифати ва самарадорлигини оширишда муҳим аҳамият касб этганини таъкидлади. Вилоят маъмурий суди раиси Зарипахон Қурбонова мазкур ислоҳотларда маъмурий судларнинг ўрни, тизимдаги янги ўзгартиришлар ҳақида иштирокчиларга батафсил маълумот берди.

Тадбирда оммавий ахборот воситалари вакиллари фуқароларнинг ҳуқуқ ва манфаатларини муҳофаза қилиш, одил судловни таъминлаш, қонунийлик ва адолат барқарорлигига эришиш борасида ўзларини қизиқтирган саволлар билан мурожаат қилдилар. Уларнинг савол, таклиф, фикр-мулоҳазаларига суд раислари ва судьялар батафсил жавоблар беришди.

Жараён аниқ далиллар, фаолиятга оид таҳлилий маълумотлар, одиллик ва шаффофликни таъминлашда эътибор қаратилаётган жиҳатларга оид масалалар билан қизғин ўтди.

Наманган вилояти судининг
жамоатчилик ва ОАВ билан алоқалар бўлими

ЭЪТИБОР ВА РАҒБАТ ФАОЛЛИККА УНДАЙДИ

Фуқаролик ишлари бўйича Янгиқўрғон туманлараро судининг раиси Соҳибахон Йўлчиева Наманган вилояти судига бу гал оиласи билан ташриф буюрди. Боиси, унинг одил судловни амалга ошириш борасидаги фаолияти Судьялар Олий кенгаши томонидан эътироф этилиб, “Ибратли судья” мукофотига лойиқ кўрилди.

Шу муносабат билан Судьялар Олий кенгаши томонидан ўтказилган тақдирлаш маросими барча ҳудудларга видеоконференцалоқа тарзида уланиб, “Ибратли судья” деб топилган суд тизими фидойиларига мукофотлар тантанали равишда топширилди.

Тақдирлаш маросимида вилоят суди раиси Алишер Усманов давлатимиз раҳбарининг Фармонига асосан жорий этилган мазкур мукофот адолат ва ҳақиқат йўлида фаолият олиб бораётган судьяларга рағбат ўлароқ, одил судловни қарор топтиришда юксак масъулият эканлигини таъкидлади.

Тадбирда шунингдек, Судьялар Олий кенгашининг қарори билан судьялик лавозимида бўлишнинг навбатдаги 10 йиллик муддатига тайинланган фуқаролик ишлари бўйича Наманган туманлараро судининг раиси Тожиддин Мадраҳимов ҳамда жиноят ишлари бўйича Уйчи туман судининг раиси Бахтиёр Обидов, янги лавозимга тайинланган судьялар Абдурасул Муҳиддинов, Бахтиёр Олимжоновнинг келгусидаги фаолиятларига муваффақият тиланди. Маросимга таклиф этилган судьяларнинг ота-оналари, оила-аъзоларига вилоят суди раиси томонидан миннатдорчилик билдирилди.

Тадбирда сўз олган судьялар кўрсатилган бундай эътибор ва рағбатдан хурсанд эканликларини айтиб, фаолиятлари давомида одил судловни таъминлашга, фуқароларнинг суд идораларига бўлган ишончини янада мустаҳкамлашга ҳалол ва виждонан, сидқидилдан ҳаракат қилишга ваъда бердилар.

ЙИЛ ЯКУНЛАРИ САРҲИСОБИ

Йил якунида амалга оширилган ишларни сарҳисоб қилиб, ижобий натижаларни эътироф этиш келгуси муваффақиятларнинг муҳим омилидир. Наманган вилояти судида бўлиб ўтган тадбирда ҳам ана шу жиҳатларга алоҳида эътибор қаратилди.

Суд фахрийлари, судьялар ва ходимлар, уларнинг ота-оналари иштирок этган байрам тадбирида Наманган вилояти суди раиси Алишер Усманов 2023 йил давомида вилоят судларида олиб борилган ислоҳотлар, одил судловни таъминлаш йўлидаги саъй-ҳаракатларга тўхталиб ўтди. Суд тизимини янги босқичга олиб чиқишга қаратилган кенг кўламли ислоҳотлар одил судлов самарадорлигида муҳим аҳамият касб этаётганини таъкидлади.

Маълумки, Ўзбекистон Республикаси Президентининг тегишли Фармонига биноан одил судловни амалга оширишда узоқ йиллар самарали меҳнат қилган судьялар учун “Суд фахрийси” кўкрак нишони жорий этилган. Байрам шодиёналари арафасида кўп йиллар судьялик лавозимида самарали фаолият олиб борган Муслимхўжа Муҳиддинов Судьялар олий кенгашининг “Суд фахрийси” кўкрак нишони билан тақдирланди. Тадбирда кўкрак нишони ўз эгасига топширилиб, устозга эҳтиром кўрсатилди.

Уcтозларнинг ҳаёт йўллари барчамиз учун ибрат мактабидир. Уларга эъзоз ва эътибор кўрсатиш эса эзгу анъана. Шу жиҳатдан, вилоят суди раиси суд фахрийлари Маҳмуджон Қурбонов ҳамда Илҳомжон Эрагашовга суд тизимидаги кўп йиллик фидокорона меҳнатлари эътирофи сифатида Ўзбекистон Республикаси Олий Суди раиси томонидан юборилган байрам табригини ўқиб эшиттирди. Фахрийларни байрам билан муборакбод этиб, эсдалик совғаларини топширди.

Тадбирнинг яна бир эсда қоларли лаҳзалари тизимда самарали фаолият олиб бораётган судья ва суд ходимларининг ота-оналарига ташаккурнома топшириш жараёни бўлди. Зеро, фарзанди ҳақида илиқ фикрлар, унинг орқасидан раҳмат эшитиш ҳар бир ота-она учун энг катта бахт. Бундай шарафга фуқаролик ишлари бўйича Наманган туманлараро судининг раиси Тожиддин Мадраҳимов, жиноят ишлари бўйича Уйчи туман судининг раиси Бахтиёр Обидов, Наманган вилояти судининг судья катта ёрдамчиси Сардор Одилов ҳамда Наманган туманлараро иқтисодий судининг судья ёрдамчиси Толибжон Тўраевнинг ота-оналари лойиқ кўрилиб, уларга ташаккурнома ҳамда эсдалик совғалари топширилди.

Йил сарҳисоби сифатида ташкил этилган тадбирда ўз фидойилиги билан намуна кўрсатаётган Наманган вилояти судининг бир гуруҳ ходимлари, шунингдек, суд тизими тарихи ва бугунини акс эттирувчи китоб тайёрлашга муносиб ҳисса қўшаётган фахрий журналист Раҳимжон Ирисов ҳам эътироф этилди. Тадбир давомида бошқа лавозимга ўтган судьялар тантанали тарзда кузатилиб, янги лавозимга тайинланган судъялар таништирилди. Уларнинг келгусидаги фаолиятларига муваффақият тиланди.

САЙЁР СУД

Жиноят ишлари бўйича Наманган шаҳар судининг судьялари томонидан Давлатобод туманидаги Маданият марказида сайёр суд мажлиси ўтказилди.

Унда ички ишлар идораларининг Пробация гуруҳи ҳисобида турувчи назорат остидаги шахсларнинг ишлари кўриб чиқилди.

Сайёр суд мажлисида тузалиш йўлига ўтган 35 нафар шахсга нисбатан инсонпарварлик тамойили қўлланилиб, улар жазодан муддатидан илгари шартли равишда озод қилинди. Суд томонидан тайинланган жазони ўташдан бўйин товлаган 3 нафар маҳкумнинг жазоси оғирроқ турдаги жазога алмаштирилди.

АДОЛАТ ВА МАЪНАВИЯТ – ЭГИЗ ТУШУНЧА

Адолат ва маънавият – ўзаро чамбарчас боғлиқ тушунчалардир. Шу боис ҳам давлатимиз раҳбари судьялар билан бўлиб ўтган учрашувларидан бирида маънавият бўлмаган жойда ҳеч қачон адолат бўлмаслиги, шунинг учун ҳам судьялар, юрист кадрларни тайёрлаш ва судьялик лавозимига тайинлашда маънавият масаласига алоҳида эътибор қаратиш лозимлигини таъкидлаган эдилар.

Наманган вилояти суди томонидан ўтказилган маънавият ва маърифат тадбирларида мамлакатимиз Президентининг ушбу фикрлари ўз ифодасини топди.

Судьялар ва суд тизими ходимларининг маънавиятини янада юксалтириш мақсадида ташкил этилган тадбирларнинг бу галгиси Тўрақўрғон туманидаги Исҳоқхон тўра Ибрат мажмуасидан бошланди. Ўзбекистон Судьялари ассоциацияси раиси Убайдулла Мингбоев, суд фахрийлари, судья ва ходимлар Ибрат ҳайкали олдида тўпланиб, ўқувчи-ёшлар томонидан тайёрланган чиқишларни томоша қилдилар. Исҳоқхон тўра Ибрат номидаги ихтисослаштирилган мактабда бўлиб, бу ерда яратилган шароитлар билан танишдилар.

Шундан сўнг иштирокчилар гуруҳларга бўлинган ҳолда бир вақтнинг ўзида учта йўналиш бўйича тадбирларда иштирок этдилар.

Жумладан, Ўзбекистон Судьялари ассоциацияси раиси Убайдулла Мингбоев, суд фахрийлари, судьялар ва ёшлар вакиллари иштирокида “Уч авлод учрашуви” ўтказилди. Уч авлод вакилларини бирлаштирган тадбирда суд фахрийлари босиб ўтган ҳаёт йўллари, бой тажрибалари ҳақида ёшларга сўзлаб бердилар. Фаолиятлари давомида рўй берган эсда қоларли ва ибратли воқеаларни ёдга олдилар. Тадбир бугунги кунда суд идораларида фаолият олиб бораётган ёшлар ва эртанги истиқболини айни соҳада кўришни истаётган талабаларнинг саволлари, фикр-мулоҳазалари билан янада қизғин ўтди.

Иккинчи йўналиш бўйича ташкил этилган Ибрат ҳаёти ва ижодига бағишланган маънавият дарсида ибратшунос олим Тоҳиржон Қозоқов, маърифтпарвар ватандошимизнинг авлодларидан Икромжон Содиқов суд ходимлари ва ўқувчи-ёшларга алломанинг ҳаёт йўли, ёзган асарлари, тилшунослик, матбаачиликда эришган ютуқлари ҳақида сўзлаб бердилар. Мазкур таълим муассасасида билим олаётган ҳар бир ёш буюк аждодимизга мос авлод бўлиши лозимлиги таъкидланди. Суд ходимлари ва ўқувчиларнинг Ибрат домла ҳақида берган саволлари учрашувни самимий ва жонли ўтишига ҳисса қўшди.

Маънавият ва маърифат тадбирларининг учинчи йўналиши Исҳоқхон тўра Ибрат номидаги чет тиллари институтида бўлиб ўтди. Унда Наманган вилояти судининг судьялари олийгоҳ талабаларига янгиланган Конституциямизнинг мазмун-моҳияти, ундаги ўзгартиришлар бўйича Конституция дарсини ўтиб бердилар. “Конституция – халқчил давлат, барқарор тараққиёт ва фаровон ҳаёт асосидир”, деган ғоя асосида ташкил этилган дарсларда Бош Қомусимизга киритилган суд-ҳуқуқ йўналишидаги янгиликлар ҳақида батафсил маълумотлар берилди. Тадбирда иштирок этган ҳар бир талабага Ўзбекистон Республикасининг Конституцияси тарқатилиб, уларнинг асосий Қонунимизда белгилаган ҳуқуқ ва бурчлари тушунтирилди.

Бир-бирига ҳамоҳанг тарзда ўтказилган тадбирлар якунида вилоят суди томонидан таълим муассасалари ва фахрий меҳмонларга китоблар жамланмаси совға қилинди.

Шундан сўнг, маънавият ва маърифат тадбирлари иштирокчилари Ибрат музейига ташриф буюришди. Яқин тарихимизни ўзида мужассам этган муассасада судья ва суд ходимлари ўтмишдан сўзловчи экспонатлар билан танишдилар. Айниқса, музейда буюк аждодимизнинг қўлёзмалари, рисолалари, фойдаланган буюмлари, суратлари, либосларининг мавжудлиги барчада катта таассурот қолдирди.

Наманган туризм ўчоқлари, тарихий ёдгорликлари, моддий маданий мерос объектларига бой бўлган замин сифатида ном қозонган. Ахсикент ёдгорлиги ана шундай қадим тамаддунлар туташган маскандир. Суд тизими ходимлари мазкур мажмуада бўлиб, бу ерда ташкил этилган очиқ осмон остидаги музейни кўздан кечирдилар. Қадимга Ахсикент шаҳристони қолдиқлари, у ердан чиққан осори-атиқалар билан танишиб, аждодларимиз томонидан бунёд этилган меъморчилик анъаналарининг гувоҳига айландилар.

Жамиятда юксак маънавий фазилатларни камол топтиришга бой маданий мерос, миллий ва тарихий анъаналар, умуминсоний қадриятларга ҳурмат билан эришилади. Айни жиҳатдан, Наманган вилояти суди томонидан ташкил этилган маънавият ва маърифат тадбирлари Янги Ўзбекистонда амалга оширилаётган маърифатли жамият концепциясининг амалий ифодаси бўлди.

НАМАНГАН ВИЛОЯТИ СУДИДА МАЪНАВИЯТ ВА МАДАНИЯТ ТАДБИРЛАРИ ЎТКАЗИЛДИ

Китоб, театр, музейлар – инсон камолотида, унинг маънавияти ва дунёқарашини юксалтиришда муҳим восита ҳисобланади. Маънавияти юксак инсон эса қайси соҳада фаолият олиб бормасин чуқур илми, етук салоҳияти билан ажралиб туради.

Шу маънода Наманган вилояти судида маънавият ва маданият тадбирлари ташкил этилди. Мазкур тадбирлар доирасида дастлаб таниқли ёзувчи Исоқжон Нишонов билан ижодий учрашув бўлиб ўтди. Наманган вилояти суди судьялари ва ходимлари иштирок этган учрашувда ёзувчининг ҳаёти ва ижоди ҳақида сўз юритилиб, унинг ёзган асарлари билан танишилди. Маълумки, Исоқжон Нишонов “Афғон шамоли”, “Жасорат”, “Довон”, “Терговчи хотиралари”, “Адолат ғори”, “Улар қотилликда айбланмайди” каби 50 дан ортиқ роман ва қиссалар муаллифи бўлиб, аксарият асарларига суд-ҳуқуқ соҳасининг адолат тамойилларини мавзу қилиб олган ва мазкур тизимда фаолият олиб бораётган шахслар ёзувчи асарларининг бош қаҳрамонига айланган.

Учрашувда роман ва қиссалар ёзилишига сабаб бўлган воқеа-ходисалар, шахслар ҳақида ижодкор томонидан қизиқарли маълумотлар берилди. Судьялар ёзувчининг асарлари билан танишар эканлар, ўз шахсий кутубхоналарини адибнинг янги китоблари билан бойитдилар.

Музейлар – тарих тилсимоти, қадриятлар бешиги. Маънавият ва маданият тадбирлари Наманган тарихи ва маданияти давлат музейида давом этди. Цивилизациялар тўқнашган масканга ташриф буюрган суд тизими ходимлари вилоятимизнинг қадим тарихи ва маданиятидан сўзловчи осори-атиқалар, экспонатлар билан танишдилар. Тарих зарварақларига муҳрланган бой маданий меросимиз, ўлмас қадриятларимизнинг гувоҳига айландилар. Музейдан олинган таассуротлар судья ва суд ходимларига эстетик ҳамда маънавий завқ бағишлади.

Театр – маънавий тарбия ва маданият масканидир, унда ҳаёт гавдаланади. Шу куни Наманган вилояти судларининг судья ва ходимлари оила-аъзолари билан вилоят мусиқали драма театрида бўлиб, “Ибрат” спектаклини томоша қилдилар. Барчамизга яхши маълумки, ватандошимиз Исҳоқхон тўра Ибрат маърифатпарвар аллома, тилшунос олим бўлиши билан бирга Тўрақўрғон заминининг илк қозиларидан бири эди. Шу маънода мазкур спектаклни томоша қилиш баробарида бугунги судьялар аввалги қозиларнинг фаолияти, уларнинг юритган ишлари билан ҳам яқиндан танишдилар. Ўтмиш ва бугунги суд тизимига, судьяларга яратилган имконият ва шароитлардан бохабар бўлдилар.

“Ибрат” тарихий драмаси ўткир сюжети, актёрларнинг маҳоратли рол ижроси билан ҳар бир томошабинни ҳаяжонга солди. Буни спектакль якунида янграган олқишлардан ҳам яққол билиш мумкин. Шу куни театрга ташриф буюрган суд тизими ходимлари ва уларнинг оила-аъзолари бой маънавий озуқа олдилар.

Вилоят суди томонидан ташкил этилган маданият ва маърифат тадбирлари суд-ҳуқуқ соҳаси вакилларининг маънавиятини юксалтириш, улар ўртасида китобга, театр санъати ва музейларга бўлган иштиёқни оширишда муҳим аҳамият касб этди.

СУДЬЯЛАР “ЯШИЛ МАКОН” УМУММИЛЛИЙ ЛОЙИҲАСИДА ИШТИРОК ЭТДИЛАР

Мамлакатимиз бўйлаб кенг кўламда ўтказилаётган “Яшил макон” умуммиллий лойиҳаси доирасида Наманган вилояти суди жамоаси эзгу ташаббусга қўл урди.

Тўрақўрғон туманидаги “Шоҳидон нурли диёр” массивида жойлашган ҳудудда “Судьялар боғи” ташкил этилиб, манзарали дарахт кўчатларини экиш ишлари олиб борилди.


Ўзбекистон Қаҳрамони Халчахон Мирзаева, фахрийлар, Наманган вилояти судининг судьялари, суд ходимлари жам бўлган кўчат экиш акциясида дастлаб вилоят суди раиси Алишер Усманов “Яшил макон” умуммиллий лойиҳасининг аҳамияти хусусида гапириб, мазкур лойиҳа юртни янада обод этиш, атроф-муҳит мусаффолигини таъминлашда муҳим эканини таъкидлади. Шундан сўнг нуронийларнинг дуолари билан кўчат экишга киришилди.


Шу куни мазкур акцияда вилоят, шаҳар, туман судларининг 200 нафардан ортиқ судья ва ходимлари иштирок этдилар. Улар 1000 тупга яқин ясень, каталпа, клён, япон сафураси каби манзарали дарахт кўчатларини ўтқаздилар.


Акция давомида онахонлар ва судья аёллар томонидан қатлама, сомса каби миллий пишириқлар пиширилиб, дастурхонга тортилди.


Тадбир доирасида Тўрақўрғон туманидаги 5-сонли умумтаълим мактабида ҳам дарахт экиш акцияси ташкил этилди. Наманган вилояти суди раиси ва судьялар мактаб ҳовлисига 20 туп манзарали дарахт кўчатлари ва турли хил гулларни экиб, таълим муассасаси ободлигига ўз ҳиссаларини қўшдилар.


Шу куни тумандаги “Тошкент” маҳалласида яшовчи кам таъминланган оила вакилларининг ҳам холидан хабар олиниб, уларга озиқ-овқат маҳсулотлари тарқатилди. Хонадонлар ҳовлисига бодом, шафтоли, олма, ўрик каби мевали дарахт кўчатлари экилиб, кўнгиллар шод этилди.


“Яшил макон” умуммиллий лойиҳаси доирасидаги тадбирлар вилоятдаги барча суд идораларида давом этмоқда.


Skip to content