НАМАНГАН ВИЛОЯТ СУДИ РАИСИ АДВОКАТЛАР БИЛАН УЧРАШДИ
Суд амалиётидан маълумки, ишни холисона кўришда, адолатни қарор топтиришда адвокатларнинг ўрни муҳим. Шундай экан, ҳимоячилар билан ваколат доирасида доимий ҳамкорликни йўлга қўйиш суд жараёнида баъзан учрайдиган тушунарсиз ҳолатларнинг олдини олади.
Айни жиҳатдан, Наманган вилоят судининг раиси Алишер Усманов вилоятда фаолият юритаётган адвокатлар билан учрашиб, очиқ мулоқот ўтказди.
Унда Ўзбекистон Республикаси Адвокатлар палатасининг Услубий маслаҳат кенгаши раиси, “Адвокат” журнали таҳрир ҳайъати раҳбари Баҳром Саломов, мазкур журналнинг бош муҳаррири Ойбек Мўминов, Адвокатлар палатаси Наманган вилоят худудий бошқармаси бошлиғи Баҳодир Каримов ҳамда вилоятда фаолият кўрсатаётган 150 га яқин адвокатлар иштирок этдилар.
Мулоқотда суд тизимида олиб борилаётган ислоҳотлар, соҳавий тартиб-таомиллар ва қонунчиликдаги ўзгаришларни аҳолига тўғри етказишда адвокатларнинг ўрни муҳим эканлиги таъкидланди. Ана шулардан келиб чиқиб, суд жараёнларида учраб турувчи айрим муаммоли ҳолатларнинг олдини олиш юзасидан фикр-мулоҳазалар билдирилди. Бу борада адвокатлар дуч келаётган ва ўз навбатида одил судловни таъминлашга тўсиқ бўлаётган камчиликлар ҳам рўй-рост ўртага ташланди.
Наманган вилоят судининг раиси Алишер Усманов суд амалиётида адвокатлар билан юзага келаётган ана шундай муаммоларга алоҳида-алоҳида, атрофлича тўхталиб, камчиликларни бартараф этиш юзасидан ишлар бошланганини айтиб ўтди. Хусусан, айрим суд биноларида адвокатлар учун шароитлар яратилмагани, суд мажлисларининг белгиланган вақтда бошланмаслиги оғриқли нуқта эканини таъкидлаб, уларнинг сабабларини тушунтириб ўтди ва бу борада аниқ чора-тадбирлар белгилаб олинганини таъкидлади.
Шу билан бирга баъзида айрим адвокатларнинг ножўя ва ноқонуний хатти-ҳаракатлари судни обрўсизлантириш, фуқароларнинг судга бўлган ишончи йўқолишига сабаб бўлаётгани ҳам тилга олинди.
Очиқ, самимий, савол-жавобларга бой тарзда ўтган мулоқот якунида мана шундай учрашувларни тез-тез ўтказиб туришга келишиб олинди.
ХАЛҚНИ ЭМАС, ХАЛҚУМИНИ ЎЙЛАГАНЛАР
Юртимизда аҳолини тадбиркорликка кенг жалб қилиш ва оилавий тадбиркорликни ривожлантириш мақсадида имтиёзли кредит маблағлари ажратилиб, бу орқали кўплаб фуқароларнинг турмуш шароити яхшиланмоқда. Банкдан олинган кредитлар ҳисобига ўз бизнесини йўлга қўйиб, оилавий тадбиркорлик билан шуғулланаётган, бу орқали ҳам ўзига, ҳам жамиятга нафи тегаётган юртдошларимиз сони ортиб боряпти. Бу яхши албатта. Бироқ, айрим ҳолларда давлат томонидан аҳоли учун ажратилаётган кредит маблағларини талон-торож қилиш, ўзлаштириш билан боғлиқ ҳолатлар ҳам учраб турибдики, бу очиқдан-очиқ халқ мулкига кўз олайтириш, давлат бюджетини талаш ҳисобланади.
1983 йилда Наманган туманида туғилган Жавоҳир Темиров (исм-шарифи ўзгартирилган) ана шундай халқ учун ажратилган пулларни ўзлаштириб, ўз эҳтиёжлари учун ишлатиб юборган кимсалардан бўлиб чиқди.
Давлат ташкилотида масъулиятли лавозимда ишлаш – халқ учун хизмат қилиш дегани. Аммо, Жавоҳир Темиров Марказий банкнинг Наманган вилоят бошқармасида мутахассис сифатида фаолият юритиб, халқни эмас, халқумини ўйлади. Бу эса алал-оқибат уни жиноятга етаклади.
Жавоҳир Темиров жиноий шериклари билан ўзаро тил бириктирган ҳолда, “Ҳар бир оила – тадбиркор“ Давлат дастури доирасида фуқароларга ажратилган кредит маблағларини ўзлаштириб, ўз эҳтиёжлари учун ишлатиб юборади. Хусусан, “Агро банк”нинг Тўрақўрғон филиалидан асаларичилик йўналиши бўйича фуқаро Г.Юсуповага ажратилган 26 млн. сўм ҳамда фуқаро А.Нуриевга ажратилган 25.5 млн. сўм пулларни жиноий шериги Жобир Сиддиқов раҳбарлигида ташкил этилган масъулияти чекланган жамият ҳисоб рақамига тушириб олади.
Яна бир ҳолатда эса “Агро банк”нинг Тўрақўрғон филиалидан иссиқхона қуриш йўналиши бўйича фуқаро С.Махмудовга ажратилган 26 млн. сўм ҳамда фуқаро И.Хабибуллаевага ажратилган 26 млн сўм миқдоридаги кредит маблағларини яна бир масъулияти чекланган жамияти ҳисоб рақамига тушириб, жиноий шериклари билан бирга пулларни ишлатиб юборади. Содир этган жиноятларини яшириш ва жавобгарликдан қочиш мақсадида эса фуқароларга маҳсулотлар етказиб берилганлиги юзасидан расмий ҳужжатларга сохта маълумотлар ва ёзувлар киритиб, банк филиалига тақдим этади.
Ўрганган кўнгил, ўртанса қўймас. Мансаб ваколатидан фойдаланган ҳолда қайта-қайта қинғир ишларга қўл урган Жавоҳир Темиров кўза кунда эмас, кунида синишини эсидан чиқариб қўйган эди. Аммо, ҳар қандай жиноий иш кун келиб фош бўлиши ва унга жазо муқаррарлиги бор гап. Айни жиҳатдан судда давлат бюджетидан ажратилган халқ пулларига хиёнат қилган Жавоҳир Темиров ҳамда унинг жиноий шериклари қилмиши атрофлича кўриб чиқилди. Суд ҳукмига кўра, жиноятчиларнинг айбига иқрорлиги ва қилмишидан пушаймонлиги ҳамда етказилган зарар қопланганлиги сабабли озодликдан маҳрум қилиш билан боғлиқ бўлмаган жазо тайинланди.
Шу ўринда бир мулоҳаза. Маълум бир касб-корга эга бўлиб, қайсидир давлат ташкилотида масъул лавозимда фаолият олиб бориш учун инсондан йиллар, машаққатли меҳнат талаб қилинади. Зеро, малакали кадр, етук мутахассис бўлишнинг ўзи осон иш эмас. Бироқ, минг афсуски, йиллар давомида қилган меҳнатлари эвазига ана шундай даражага етган айрим кимсаларнинг жиноятга қўл уриб, элу юрт олдида шарманда бўлаётгани таажубланарли. Мақолада келтирилган ҳолат ҳам фикримизга яққол мисол.
Шуҳратжон Қурбонов,
Наманган вилояти судининг судьяси
ИНСОН ҲУҚУҚЛАРИ – ОЛИЙ ҚАДРИЯТ
Наманган вилояти судининг фуқаролик ишлари бўйича судлов ҳайъати томонидан Наманган вилояти юридик техникумида тадбир ташкил этилди. Давлатимиз раҳбарининг “Ўзбекистон Республикасида Инсон ҳуқуқлари соҳасидаги миллий таълим дастурини тасдиқлаш тўғрисида”ги қарорида 2023 йилнинг февраль ойида мамлакатимизда “Инсон ҳуқуқлари” ҳафталигини ўтказиш белгиланган бўлиб, ўқувчи-ёшлар билан ташкил этилган ушбу тадбир мазкур ҳафталикка бағишланди.
Тадбирда иштирок этган Наманган вилояти судининг фуқаролик ишлари бўйича судлов ҳайъати раиси Абдураҳмон Сафаев мамлакатимиз Президентининг мазкур қарори мазмун-моҳияти, унда белгиланган муҳим вазифалар ҳақида батафсил маълумот берди. Хусусан, Қарорга асосан 2023/2024 ўқув йилидан бошлаб профессионал ва олий таълим тизимида “Инсон ҳуқуқлари”, “Аёллар ҳуқуқлари”, “Бола ҳуқуқлари” бўйича тегишлича ўқув ва махсус курслар жорий этилиши таъкидланди.
Шунингдек, 2023 йил 1 июндан бошлаб Марказ томонидан ҳар йили “Инсон ҳуқуқлари ва эркинликлари соҳасидаги таълим ва инновациялар” миллий танлови ўтказиб борилиши, ногиронлиги бўлган шахслар ҳуқуқлари, аёллар ҳуқуқлари, бола ҳуқуқлари ва мигрантлар ҳуқуқлари йўналишларида фаолияти мазкур шахслар билан бевосита боғлиқ бўлган ташкилотларда ўқув курслари ва семинар-тренинглар ташкиллаштирилиши белгиланди.
Мазкур қарорда кўрсатиб ўтилган ҳар бир йўналишдаги ишларни амалга оширилиши мамлакатимизда инсон ҳуқуқ ва эркинликларини янада ишончли ҳимоя қилинишини таъминлаши таъкидлаб ўтилди.
Очиқ ва самимий руҳда кечган мулоқотларда ўқувчи-ёшлар ўзларини қизиқтирган саволларга жавоб олдилар.
ЁШЛАР БИЛАН УЧРАШУВ
Наманган туманлараро маъмурий суди томонидан Наманган юридик техникумида тадбир ташкил этилди. Ўқув муассасасининг ўқувчи-ёшлари билан бўлиб ўтган мулоқотда давлатимиз раҳбарининг жорий йилнинг 16 январь куни қабул қилинган “Одил судловга эришиш имкониятларини янада кенгайтириш ва судлар фаолияти самарадорлигини оширишга доир қўшимча чора-тадбирлар тўғрисида”ги Фармони мазмун-моҳияти ҳақида сўз борди.
Тадбирда иштирок этган Наманган туманлараро маъмурий судининг судьялари Бибихон Акбарова, Сойибжон Рахимов Президант фармонида белгиланган муҳим йўналишлар, одил судловни таъминлаш борасидаги асосий вазифаларга тўхталиб ўтдилар. Хусусан, ушбу ҳужжат билан 2023-2026 йилларда суд тизимини сифат жиҳатидан янги босқичга олиб чиқишнинг қисқа муддатли Стратегияси ва уни амалга ошириш бўйича Ҳаракатлар дастури тасдиқлангани, Стратегия доирасида одил судловни таъминлашнинг устувор вазифалари этиб “Инсон қадри учун” ғояси асосида чинакам адолатли суд тизимини шакллантириш ҳамда унинг фаолиятини халқ манфаати ва инсон қадр-қимматини самарали ҳимоя қилишга йўналтириш белгилангани алоҳида таъкидланди.
Фармон билан суд тизими олдида турган долзарб вазифаларнинг самарали амалга оширилишини таъминлаш мақсадида Олий суд тузилмаси такомиллаштирилиб, Одил судлов соҳасидаги қонунчиликни таҳлил қилиш департаменти, Ахборот-коммуникация мониторинги – Вазиятлар маркази ҳамда Жамоатчилик билан ҳамкорлик маркази ташкил этилгани айтиб ўтилди.
Тадбирда шунингдек, “Коррупция – тараққиёт кушандаси” мавзусида ҳам фикр-мулоҳазалар юритилди.
Очиқ, самимий руҳда кечган мулоқотларда ўқувчи-ёшлар ўзларини қизиқтирган саволларга судьялардан батафсил жавоб олдилар.
Озодбек Зиёвиддинов,
Наманган туманлараро
маъмурий судининг раиси
“СУДЬЯ ВА ЁШЛАР” УЧРАШУВИ
Суд-ҳуқуқ тизимида олиб борилаётган ислоҳотлар ва қонунчиликдаги сўнгги янгиликлар моҳиятини тарғиб қилиш бўйича ёшлар билан доимий мулоқотни йўлга қўйиш муҳим аҳамиятга эга. Айни жиҳатдан фуқаролик ишлари бўйича Учқўрғон туманлараро суди томонидан Наманган шаҳридаги Президент мактабида “Судья ва ёшлар” учрашуви ташкил этилди.
2023 йил – “Инсонга эътибор ва сифатли таълим йили” доирасида ўтказилган мазкур тадбирда Президент мактаби ўқувчиларига судьялар томонидан суд-ҳуқуқ тизимидаги сўнгги янгиликлар ҳақида маълумот берилди. Жумладан, давлатимиз раҳбари томонидан шу йилнинг 16 январь куни қабул қилинган «Одил судловга эришиш имкониятларини янада кенгайтириш ва судлар фаолияти самарадорлигини оширишга доир қўшимча чора-тадбирлар тўғрисида» ва «Одил судлов фаолиятини амалга оширишни самарали ташкил этиш бўйича қўшимча чора-тадбирлар тўғрисида»ги Фармонлари мазмун-моҳияти атрофлича тушунтирилди.
Албатта, Президент мактаби ўқувчилари орасида келгусида суд тизимида фаолият олиб бориб, адолатли судья бўлишни мақсад қилган ёшлар ҳам топилади. Айни жиҳатдан самимий мулоқотларда судьялик касби, унинг масъулияти ҳақида ҳам сўз борди. Ўз ўрнида ўқувчилар ўзларини қизиқтирган саволлар билан мурожаат қилиб, судьялардан батафсил жавоб олдилар.
Санобар Тўрабаева,
фуқаролик ишлари бўйча Учқўрғон туманлараро суди судьяси
Суд-ҳуқуқ ислоҳоти: “Инсон қадри учун”
Жорий йилнинг 16 январь куни Президентимиз томонидан қабул қилинган “Одил судловга эришиш имкониятларини янада кенгайтириш ва судлар фаолияти самарадорлигини оширишга доир қўшимча чора-тадбирлар тўғрисида”ги ҳамда “Одил судлов фаолиятини амалга оширишни самарали ташкил этиш бўйича қўшимча чора-тадбирлар тўғрисида”ги фармонлар 2022-2026 йилларга мўлжалланган Янги Ўзбекистоннинг Тараққиёт стратегиясида белгиланган вазифаларга мувофиқ суд ҳокимиятининг чинакам мустақиллигини таъминлаш, судлар фаолияти самарадорлиги ва одил судлов сифатини оширишда муҳим қадам бўлди.
Ушбу ҳужжатларга мувофиқ, суд тизимини сифат жиҳатидан янги босқичга олиб чиқишнинг қисқа муддатли Стратегияси ва уни амалга ошириш бўйича Ҳаракатлар дастури тасдиқланди. Стратегия доирасида одил судловни таъминлашнинг устувор вазифалари этиб “Инсон қадри учун” ғояси асосида чинакам адолатли суд тизимини шакллантириш, унинг фаолиятини халқ манфаати ва инсон қадр-қимматини самарали ҳимоя қилишга йўналтириш белгиланди. Бу нима дегани?
Давлатимиз раҳбари Шавкат Мирзиёев халқ манфаатини ҳар нарсадан устун қўйиб, юртимизда халқ давлат идораларига эмас, давлат идоралари халқимизга хизмат қилишини белгилаб берди. Мазкур тамойил бугун барча соҳаларда ўз тасдиғини топиб, аҳолининг ҳуқуқ ва манфаатлари таъминланмоқда. йни жиҳатдан, мазкур фармон билан адолатли суд тизимини шакллантириш судларда халқ манфаати ва инсон қадр-қимматини самарали ҳимоя қилиш орқали амалга оширилиши белгилаб қўйилди.
Бу икки муҳим ҳужжат билан суд ишларини юритишда тортишув ва тарафларнинг тенглиги тамойилларини тўлақонли рўёбга чиқариш, судлар холислигини амалда таъминлашга қаратилган қонунчиликни такомиллаштириш, судлар фаолиятини тўлиқ рақамлаштириш, суд мажлисларида масофадан туриб иштирок этиш имкониятларини кенгайтириш, судьялар мустақиллиги ва дахлсизлиги кафолатларини кучайтириш, суд қарорларининг қатъий ижросини таъминлаш, бу борада давлат органлари ва маҳаллий ҳокимликларнинг масъулиятини ошириш, судьялар ва суд ходимларида юксак муомала маданиятини шакллантириш орқали судга мурожаат қилган ҳар бир фуқаро ва тадбиркорда суддан, давлатдан розилик ҳиссини уйғотиш белгилаб қўйилди.
Фармонда судьяларнинг чинакам мустақиллигини таъминлаш мақсадида уларнинг ишига ҳар қандай аралашув қатъий жазоланиши, судьяларнинг хавотирсиз ишлаши учун давлат томонидан барча шароитлар яратилиши қайд этилди. Бу бежиз эмас, албатта. Айрим ҳолатларда суд томонидан чиқарилган қарордан норози бўлиб, турли кўринишда тазйиқ ўтказиш, суд чақирувига кўра суд процессларига қасддан келмаслик, судьяни жамоатчилик олдида обрўсизлантириш ҳолатлари учраб турибди.
Ҳужжатлар Янги Ўзбекистонда ислоҳотларнинг долзарб бўғини бўлган суд-ҳуқуқ тизимини ислоҳ қилиш, фуқароларнинг ҳуқуқ ва манфаатларини ҳимоя қилиш борасидаги муҳим қадам бўлди.
Наманган вилояти судининг раиси
ОДИЛ СУДЛОВ САМАРАДОРЛИГИ
ЭЪЗОЗ ВА ЭЪТИБОР ЭЪТИРОФИ
Жамиятимиздаги барча соҳаларда тарих, бугун ва келажакни ўзида мужассам этган “Уч авлод учрашувлари” маънавий-маърифий тадбирларни ўтказиш яхши анъанага айланди. Бундай тадбирларнинг аҳамиятли жиҳати шундаки, мулоқотларда иштирок этган ёшлар кекса авлод вакилларидан ҳаётий тажриба ўрганишса, бугунги соҳа фидойиларидан амалий кўникма ва тавсияларга эга бўлишади. Бу эса эртамиз эгаларининг истиқболида ғоят муҳим.
Наманган вилояти судида бўлиб ўтган ана шундай “Уч авлод учрашуви”да кўп йиллар республикамиздаги турли соҳаларда раҳбарлик лавозимларида фаолият олиб борган инсонлар, суд тизимида ишлаган фахрийлар, айни пайтда вилоятимиздаги суд идораларида меҳнат қилаётган судьялар ҳамда талаба-ёшлар иштирок этдилар.
Уч авлод вакилларини бирлаштирган тадбир самимий, очиқ мулоқотлар тарзида ўтди. Унда иштирок этган Олий Мажлис Сенати аъзоси, “Нуроний” жамғармаси вилоят кенгаши раиси Икромхон Нажмиддинов аввалги даврлардаги қийинчиликлар, меҳнат палласидаги машаққатлар, бугунги ўзгаришлар ва нуронийларга кўрсатилаётган ҳурмат-эҳтиром ҳақида фикр билдирди. Кўп йиллар суд, прокуратура, бошқа ҳуқуқни муҳофаза қилувчи идораларда фаолият олиб борган, бугунги кунда кексалик гаштини сураётган фахрийлар сўзга чиқиб, босиб ўтган ҳаёт йўллари, бой тажрибалари ҳақида ёшларга сўзлаб бердилар. Фаолиятлари давомида рўй берган эсда қоларли ва ибратли воқеаларни эсга олдилар.
Суҳбат ва мулоқотларда мамлакатимизда инсон омилига юксак эътибор берилаётгани, давлатимиз раҳбари ташаббуси билан суд-ҳуқуқ тизимида кенг кўламли ислоҳотлар амалга оширилаётгани ва бу судларни чинакам “Адолат қўрғони”га айланиши, фуқаролар ҳуқуқ ва манфаатлари, қонун устуворлигини таъминлашда муҳим аҳамият касб этаётгани таъкидланди.
Тадбир бугунги кунда суд идораларида фаолият олиб бораётган ёшлар ва эртанги истиқболини айни соҳада кўришни истаётган талабаларнинг саволлари, фикр-мулоҳазалари билан янада қизғин ўтди.
Умрини эл хизматига бахшида этган инсонлар ҳамиша эъзоз ва эътиборда. Уларнинг босиб ўтган ҳаёт йўллари, тажрибалари эса ёшларга ибрат мактабидир.
Шу маънода учрашув кўп йиллар суд тизимида фаолият олиб бориб, суд мажлиси котиби лавозимидан Ўзбекистон Республикаси Олий суди судьяси лавозимигача бўлган ибратли йўлни босиб ўтган суд фахрийси Мамаджон Ғанижоновни қутлуғ 70 ёшлари билан қутлашга уланиб кетди.
Дастлаб, Мамаджон Ғанижонов Ўзбекистон фахрийларининг ижтимоий фаолиятини қўллаб-қувватлаш “Нуроний” жамғармаси васийлик кенгашининг биринчи даражали “Меҳнат фахрийси” кўкрак нишони билан тақдирланди. Шундан сўнг, Наманган вилояти суди раиси Алишер Усманов Устозни қутлуғ 70 ёшлари билан муборакбод этиб, Ўзбекистон Республикаси Олий суди, Судьялар Олий кенгаши, Наманган вилояти судлари ва вилоят ҳокимлигининг табриклари ҳамда эсдалик совғаларини топширди. Ўзбекистон Судьялари Ассоцияцияси томонидан йўлланган табрик ва тақдим этилган совғалар суд тизимида меҳнат фахрийларига кўрсатилаётган эъзоз ва эҳтиромнинг амалдаги ифодаси бўлди.
СУДЛАРДА ОЧИҚЛИК ВА ОШКОРАЛИКНИНГ АМАЛДАГИ ИФОДАСИ
Очиқлик, ошкоралик, шаффофлик, холислик суд тизими фаолиятида ғоят муҳим аҳамиятга эга бўлиб, бу одил судловни таъминлаш ва судларнинг чинакам “Адолат қўрғони”га айланишига хизмат қилади.
Шу маънода судлар фаолиятидан жамоатчиликни мунтазам хабардор қилиб бориш яхши анъанага айлангани демократик ислоҳотлар тобора долзарблик касб этиб бораётган бугунги давр одимларига хос ва мос.
Ўзбекистон Республикаси Президентининг “Суд-ҳуқуқ тизимини янада такомиллаштириш ва суд ҳокимияти органларига ишончни ошириш чора-тадбирлари тўғрисида”ги Фармонида судлар фаолияти тўғрисида жамоатчилик ва оммавий ахборот воситаларини хабардор қилиш мақсадида ҳар чоракда вилоят судлари раислари ва уларнинг ўринбосарлари томонидан брифинглар, матбуот анжуманлари ўтказиш белгиланган.
Наманган вилояти судида ташкил этилган навбатдаги матбуот анжумани вилоят судларининг 2022 йидаги фаолият якунларига бағишланди.
Анжуманда дастлаб Президентимиз томонидан шу йилнинг 16 январь куни қабул қилинган “Одил судловга эришиш имкониятларини янада кенгайтириш ва судлар фаолияти самарадорлигини оширишга доир қўшимча чора-тадбирлар тўғрисида” ҳамда “Одил судлов фаолиятини амалга оширишни самарали ташкил этиш бўйича қўшимча чора-тадбирлар тўғрисида”ги Фармонларнинг мазмун-моҳияти тадбир қатнашчиларига батафсил тушунтирилди. Мазкур икки муҳим ҳужжат билан аҳолининг одил судловга эришиш имкониятлари янада кенгайтирилиши, 2023-2026 йилларда суд тизимини сифат жиҳатдан янги босқичга олиб чиқилиши таъкидланди.
Матбуот анжуманида Наманган вилояти судининг раиси ҳамда вилоят маъмурий судининг раиси судларда адолат ва қонун устуворлигини таъминлаш, фуқароларнинг ҳуқуқ ва манфаатларини ишончли ҳимоя қилиш бўйича амалга оширилган ишлар юзасидан ахборот бердилар.
Таҳлиллар, талқинлар, тафсилотларда вилоятдаги суд идоралари томонидан 2022 йил давомида кўрилган жиноят, фуқаролик, иқтисодий ҳамда маъмурий ишлар таҳлили, жиноят ишлари бўйича судлар томонидан чиқарилган айблов ҳукмлари, жазо амалиёти, ишларни юқори инстанцияларда кўриш, оқлов ҳукми, судланганлик ҳолати шунингдек, жисмоний ва юридик шахслардан келиб тушган мурожаатлар юзасидан фаолият, ҳуқуқий тарғибот жараёнлари ифода топди.
Оммавий ахборот воситалари вакиллари матбуот анжуманида фуқаролларнинг ҳуқуқ ва манфаатларини муҳофаза қилиш, одил судловни таъминлаш, қонунийлик ва адолат барқарорлигига эришиш борасида ўзларини қизиқтирган саволларга батафсил жавоблар олдилар.
Жараён аниқ далиллар, фаолиятга оид таҳлилий маълумотлар, одиллик ва шаффофликни таъминлашда эътибор қаратилаётган жиҳатларга оид масалалар билан қизғин ўтди.
Наманган вилояти судининг
жамоатчилик ва ОАВ билан алоқалар бўлими