ADOLAT KUYCHISIGA SUDYALARNING EHTIROMI

Davlatimiz rahbari sudyalar bilan bo‘lgan uchrashuvda ma’naviyat bo‘lmagan joyda hech qachon adolat bo‘lmasligi, shuning uchun ham sudyalar, yurist kadrlarni tayyorlash va sudyalik lavozimiga tayinlashda ma’naviyat masalasiga alohida e’tibor qaratish lozimligini ta’kidlagan edilar. Prezidentimizning mazkur fikrlaridan kelib chiqib Namangan viloyati sudida muntazam ravishda ma’naviyat va ma’rifat tadbirlari o‘tkazish an’anaga aylangan.

Otashin shoir, tarjimon va dramaturg Usmon Nosir tavalludining 112 yilligi oldidan Namangan viloyati sudi tomonidan o‘tkazilgan ma’naviy-ma’rifiy tadbir ham sudyalar va sud tizimi xodimlarining ma’naviyatini yanada yuksaltirishga, ularni kitobga, adabiyotga, teatr san’atiga bo‘lgan qiziqishini yanada oshirishga xizmat qildi.


Dastlab sud xodimlari Namangan shahridagi Usmon Nosir muzeyida bo‘lib, u yerdagi eksponatlar, shoir hayoti va ijodiga oid qo‘lyozmalar, kitoblar bilan tanishdilar. Ayniqsa, muzeyda buyuk ajdodimizning tarixiy qo‘lyozmalari, risolalari, suratlari mavjudligi barchada katta taassurot qoldirdi.

Shundan so‘ng, Namangan shahridagi Usmon Nosir nomli xiyobonda shoir hayoti va ijodiga bag‘ishlangan adabiy-badiiy tadbir o‘tkazildi. Nuroniylar, sud faxriylari, shoirning avlodlari, sudyalar va tizim xodimlari ishtirok etgan ma’naviyat tadbirida dastlab shoir xotirasiga hurmat bajo keltirilib, uning haykali poyiga gullar qo‘yildi. So‘ng, otashin shoirning hayoti va ijodiga to‘xtalib, uning bolalik, o‘smirlik yillari, boshidan kechirgan og‘ir kunlari yodga olindi. Sudya va tizim xodimlari tomonidan Usmon Nosir she’rlaridan namunalar o‘qib eshttirilgani tadbirni chinakam she’riyat kechasiga aylantirib yubordi.

Teatr – ma’naviy tarbiya va madaniyat maskanidir, unda hayot gavdalanadi. Shu kuni sudya va xodimlar, ularning oila-a’zolari viloyat musiqali drama teatrida bo‘lib, Iqbol Mirzo asari asosida sahnalashtirilgan “Usmon Nosir” spektaklini tomosha qildilar.


Spektakl o‘tkir syujeti, aktyorlarning mahoratli rol ijrosi bilan har bir tomoshabinni hayajonga soldi. Buni spektakl yakunida yangragan olqishlardan ham yaqqol bilish mumkin. Shu kuni teatrga tashrif buyurgan sud tizimi xodimlari va ularning oila-a’zolari boy ma’naviy ozuqa oldilar.

Ma’naviyat va ma’rifat tadbirlaridan olingan taassurotlar nuroniylar va sud faxriylari davrasida bir piyola choy ustida davom ettirildi.

TERGOVCHILAR UCHUN SEMINAR

O‘zbekiston Respublikasi Oliy sudi raisining birinchi o‘rinbosari Ikrom Muslimov tomonidan Namangan tumanida mamlakatimiz Prezidentining 2024-yil 10-iyundagi “Tezkor-qidiruv hamda tergov faoliyatida shaxsning huquq va erkinliklarini ishonchli himoya qilish kafolatlarini yanada kuchaytirish chora-tadbirlari to‘g‘risida”gi Farmoni mazmun-mohiyati yuzasidan seminar o‘tkazildi.

Sudyalar, tergov tizimi xodimlari, aholi vakillari ishtirok etgan seminarda “O‘zbekiston – 2030” strategiyasida belgilangan ustuvor yo‘nalishlardan kelib chiqib, Prezident Farmoni bilan 2025-yil 1-yanvardan boshlab jinoyat ishlari bo‘yicha sudga qadar ish yurituv davrida protsessual qarorlarga sanksiya berish masalasi jinoyat ishlari bo‘yicha tuman, shahar sudlarida alohida sudyalar – tergov sudyalari tomonidan ko‘rib chiqilishi, shu maqsadda jinoyat ishlari bo‘yicha tuman, shahar sudlarida tergov sudyasi lavozimi joriy etilgani haqida ma’lumot berildi. Bundan ko‘zlangan maqsad, sudlar faoliyati samaradorligini oshirish, ishni sudga qadar yuritishda taraflarning tengligi va tortishuvi prinsipini amalda ta’minlash, shuningdek, tezkor-qidiruv hamda tergov faoliyatida shaxsning huquq va erkinliklarini samarali himoya qilinishiga erishishdan iborat ekanligi ta’kidlandi.

Tergov sudyalariga ma’muriy huquqbuzarliklar to‘g‘risidagi ishlarni ko‘rib chiqish vakolati berilib, ular tomonidan ko‘rib chiqiladigan ma’muriy huquqbuzarlik to‘g‘risidagi ishlarni yuqori instansiyalarda qayta ko‘rib chiqishning amaldagi tartibi saqlab qolinmoqda. Shuningdek, tergov sudyasiga 11 turdagi sanksiyalar va majburlov choralarini qo‘llash masalasini ko‘rib chiqish vakolati ham berilmoqda.

Fikr-mulohazalar hamda savol-javoblarga boy tarzda o‘tgan seminar davomida yangi tashkil etilayotgan tergov sudyalari faoliyati bilan bog‘liq savollarga batafsil javob olindi. 

«SUDYA VA YOSHLAR» UCHRASHUVI

Oliy ta’lim muassasasida ta’lim olayotgan yoki uni bitirish arafasida turgan talabalar bilan turli soha vakillari ishtirokida uchrashuvlar o‘tkazish yoshlarning ertangi hayoti, ma’lum bir kasb tanlashida muhim omil hisoblanadi. Ayni jihatdan, Namangan davlat universitetining yuridik fakulteti talabalari bilan o‘tkazilgan “Sudya va yoshlar” uchrashuvi ham ertangi faoliyatini sud idoralari bilan bog‘lash niyatidagi ko‘plab yigit-qizlarga o‘ziga xos motivatsiya bo‘ldi.

O‘zbekiston Respublikasi Oliy sudi raisining birinchi o‘rinbosari Ikrom Muslimov, Oliy sud Kadrlar boshqarmasi boshlig‘i Muzaffar Muxitdinov, viloyat sudi raislari ishtirokida bo‘lib o‘tgan uchrashuvda dastlab keyingi yillarda sudlarda amalga oshirilayotgan islohotlar haqida so‘z yuritilib, mazkur jarayonlarda tizim xodimlari uchun yetarli sharoit va imkoniyatlar, ijtimoiy kafolatlar yaratilgani ta’kidlandi. Shu bilan birga yuqori malakali, chuqur bilim va ko‘nikmalarga ega kadrlar yordamidagina sudlarning chinakam mustaqilligini ta’minlash, ularning faoliyati samaradorligi va odil sudlov sifatini oshirishdek ezgu maqsadlarga erishish mumkinligi aytib o‘tildi. Bu o‘rinda esa O‘zbekiston Respublikasi Oliy sudi va Namangan davlat universiteti o‘rtasida yuridik kadrlarni tayyorlash sohasidagi o‘zaro hamkorlik to‘g‘risida Memorandum imzolangani, mazkur hujjatga asosan oliygoh talabalarining sud tizimida maxsus amaliyotini tashkil etish va o‘tkazish bo‘yicha “Bo‘lajak sud xodimlari” klubi joriy etilgani ta’kidlandi. 

Uchrashuv ochiq muloqot tarzida olib borildi. Oliy sud raisining birinchi o‘rinbosari Ikrom Muslimov sohadagi islohotlarga to‘xtalib, sudyalik kasbining adolatni, inson huquq va manfaatlarini ta’minlashdagi ahamiyati, kelgusida mazkur tizimda faoliyat olib borishni istagan yoshlar mustahkam bilim olishga intilishi, o‘z ustida ishlashi zarurligiga e’tibor qaratdi.

Bugungi kunda Namangan davlat universitetining yuridik fakultetida kunduzgi, kechki va sirtqi ta’lim yo‘nalishlarida jami 800 nafarga yaqin talaba tahsil olmoqda. Albatta ular orasida sud-huquq sohasiga qiziquvchilar ko‘pchilikni tashkil etadi. Ayni jihatdan, yuzma-yuz muloqotda talaba-yoshlar qonunchilik islohotlari, sud tizimidagi o‘zlarini qiziqtirgan savollar bilan murojaat qildilar. Yigit-qizlarning savollariga hayotiy misollar, amaliyotda uchraydigan voqea-xodisalar bilan javob qaytarilgani bo‘lajak huquqshunoslarni sud tizimiga, sudyalikka bo‘lgan qiziqishini yanada oshirdi.

Yoshlar – ertangi kunimizning, Yangi O‘zbekistonning egalaridir. Shu jihatdan, ularni bugungi islohotlarga, yurt kelajagiga daxldor etib tarbiyalash, yuksak marralar sari ruhlantirish – Vatan taraqqiyotiga xizmat qiladi. “Sudya va yoshlar” uchrashuvi ham ayni jihatdan muhim ahamiyat kasb etdi.

QADRDON MASKANDAGI UCHRASHUV

Namangan viloyati sudi raisi Alisher Usmanov Chust tumanidagi o‘zi ta’lim olgan 42-sonli ixtisoslashtirilgan maktab-internatida bo‘lib, o‘quvchi-yoshlar bilan uchrashdi.

1 oktabr – O‘qituvchi va murabbiylar kuni oldidan tashkil etilgan yo‘qlov tadbirida Ustozlar, viloyat sudi raisi bilan birga o‘qigan sinfdoshlar jam bo‘ldilar. Muloqotlarda o‘quvchilik yillari yodga olinib, bolalik xotiralari eslandi. Barcha muvaffaqiyatlarning kaliti ilm-ma’rifat ekani ta’kidlanib, yoshlarga bilim olishdan aslo to‘xtamaslik bo‘yicha tavsiyalar berildi.

Shundan so‘ng viloyat sudi raisi maktab jamoasiga Namangan viloyati sudlari tarixiga bag‘ishlab chop etilgan “Moziyga bir nazar…” nomli kitob-albom hamda badiiy adabiyotlar to‘plamini sovg‘a qildi. Ta’lim-tarbiya sohasiga munosib hissa qo‘shib kelayotgan o‘qituvchilar, faol va tashabbuskor o‘quvchilarga viloyat sudining tashakkurnomalari hamda esdalik sovg‘alari topshirildi.

Maktab-internatning sobiq o‘quvchilari bilan bo‘lib o‘tgan mazkur uchrashuv ertangi faoliyatini huquqni muhofaza qiluvchi idoralar, davlat tashkilotlari bilan bog‘lash niyatidagi ko‘plab o‘g‘il-qizlarga o‘ziga xos motivatsiya bo‘ldi.

QADRDON MASKANGA TASHRIF

Namangan viloyati sudi raisi Alisher Usmanov Chortoq tumanidagi o‘zi o‘qigan maktablarga tashrif buyurib, o‘quvchi-yoshlar bilan uchrashdi.

Dastlab 11-sonli umumta’lim maktabida bo‘lgan viloyat sudi raisi ta’lim muassasasida o‘tgan o‘quvchilik yillarini eslab, bilim bergan Ustozlarini, sinfdoshlarini yodga oldi. O‘sha paytlardagi sharoitlaru bugungi yoshlarga, ta’lim-tarbiyaga berilayotgan e’tibor xususida fikr bildirib, yurtimizda o‘qiyman degan har bir yosh uchun barcha imkoniyatlar yetarli ekanini ta’kidladi. Buning uchun esa bilim olishga befarq bo‘lmaslik, ko‘p kitob o‘qish kerakligini aytib o‘tdi. Maktab jamoasiga Namangan viloyati sudi tomonidan nashr etilgan sudlar tarixiga bag‘ishlangan “Moziyga bir nazar…” nomli kitob-albom hamda badiiy adabiyotlar to‘plami sovg‘a qilindi. Ta’lim-tarbiya sohasiga munosib hissa qo‘shib kelayotgan o‘qituvchilarga viloyat sudining tashakkurnomalari topshirildi. Eng asosiysi, viloyat sudi raisining tashabbusi bilan tez kunlarda maktab hovlisini obodonlashtirish va tadbirlar o‘tkaziladigan maydonchani asfaltlash bo‘yicha rejalar belgilab olindi.

Keyingi manzil viloyat sudi raisi boshlang‘ich ta’lim olgan 49-sonli umumta’lim maktabi bo‘ldi. Qadrdon sinfdoshlar, maktab jamoasi va o‘quvchilar jam bo‘lgan uchrashuv, intilganga hamisha tole yor ekanligining amaliy ifodasi bo‘ldi. Boisi, bundan 53 yil oldin ayni shu maktabda ilk bor o‘qish-yozishni o‘rgangan sobiq o‘quvchi bugun nufuzli idoralarda rahbarlik lavozimlarida faoliyat olib borayotganini yoshlar o‘z ko‘zlari bilan ko‘rdilar. Viloyat sudi raisi mazkur ta’lim dargohi jamoasiga ham “Moziyga bir nazar…” nomli kitob-albom, badiiy adabiyotlar to‘plami va zamonaviy televizor sovg‘a qildi. Faol o‘qituvchilarga esa tashakkurnoma va esdalik sovg‘alari topshirildi.

Shundan so‘ng viloyat sudi raisi maktabning 9-sinf o‘quvchilariga “Bir bo‘lsak – yagona xalqmiz, birlashsak – Vatanmiz” shiori ostida “Mustaqillik darslari”ni o‘tib berdi.    

UCH AVLOD UCHRASHUVI

Namangan viloyati sudida O‘zbekiston Respublikasi Davlat mustaqilligining 33 yilligi munosabati bilan “Uch avlod uchrashuvi” o‘tkazildi.

Umrini el-yurt xizmatiga baxshida etgan insonlarning xotirasi abadiy, qadri muqaddas. Ular garchi oramizda bo‘lmasalar ham bosib o‘tgan umr yo‘llari, qoldirgan ezgu amallari ko‘plar uchun ibrat maktabidir. Shu ma’noda mazkur tadbir turli yillarda viloyat sud idoralarida faoliyat olib borgan marhum sudyalar xotirasiga bag‘ishlandi. Uchrashuvga ularning oila-a’zolari, shogirdlari, hamkasblari taklif etildilar.

Namangan viloyati sudi raisi Alisher Usmanov o‘tganlarni yod etib, ularning ezgu fazilatlari, sudyalik kasbiga bo‘lgan sadoqatlarini xotirladi. O‘tganlar xotirasiga bag‘ishlangan videorolik namoyishi esa barcha tadbir ishtirokchilarining qalb tublarida yotgan his-tuyg‘ularini junbushga keltirib, dillaridagi xayajonlarini tillariga ko‘chirdi. So‘zga chiqqanlar ota-onalari, aka-ukalari, o‘g‘il-qizlari bilan bog‘liq shirin xotiralarni esladilar. Yaqinlariga ko‘rsatilgan bunday ehtiromdan minnatdor ekanliklarini bildirdilar.

Tadbirda so‘z olgan faxriylar keyingi yillarda mamlakatimizda sud idoralari hamda sudyalarga qaratilayotgan e’tibor xususida gapirib, mazkur jarayonlarda ayniqsa, tizimda ko‘p yillar mehnat qilgan faxriylarni qo‘llab-quvvatlash borasida ijobiy ishlar olib borilayotganini ta’kidladilar. Bugungi “Uch avlod uchrashuvi”, xotira tadbiri ham buning yorqin ifodasi ekanligini aytib o‘tdilar.

Shundan so‘ng, tadbir ishtirokchilarining har biriga Namangan viloyati sudi tomonidan nashr etilgan viloyat sudlari tarixiga bag‘ishlab yozilgan “Moziyga bir nazar…” nomli kitob-albom sovg‘a qilindi.

Tantanali tadbirda shuningdek, uzoq yillar sud tizimida samarali faoliyat olib borib, ko‘plab shogirdlar tarbiyalagan, ayni kunlarda qutlug‘ 60 yoshni qarshi olgan Nurillo Abbosovga viloyat sudi raisining tabrigi o‘qib eshittirilib, muborakbod etildi.

Uch avlod vakillarini birlashtirgan uchrashuvning yana bir ahamiyatli jihati tadbirda bu yil Namangan viloyatidan Sudyalar oliy maktabiga o‘qishga qabul qilingan 12 nafar yoshlarga oq yo‘l tilandi. Ular sud darg‘alari, marhum sudyalarning oila-a’zolari, hamkasblari davrasida ezgu niyatlar bilan sudyalik sari ilk qadamlarini tashladilar.

 

NAMANGAN VILOYATI SUDI AXBOROT XIZMATI

AHOLI MUROJAATLARI O’RGANILDI

Jismoniy va yuridik shaxslarning murojaatlarini o‘rganish va ularga ijobiy yechim topish maqsadida joylarda tashkil etilayotgan ommaviy sayyor qabullarning navbatdagisi Namangan tumanining «Mirishkor» mahallasi hududida bo‘lib o‘tdi.

Sud va huquqni muhofaza qiluvchi organlar rahbarlari ishtirokida o‘tkazilgan qabullarda fuqarolar o‘zlarini o‘ylantirayotgan muammo va masalalar bo‘yicha murojaat qildilar. Xususan, shu kuni viloyat sudi raisi Alisher Usmanov hamda viloyat ma’muriy sudi raisi Zaripaxon Qurbonova aholi vakillarining sud-huquq yo‘nalishiga doir 17 ta murojaatlarini o‘rgandilar. Ularning 8 tasi shu yerning o‘zida ijobiy hal etilgan bo‘lsa, qolganlariga huquqiy tushuntirishlar berildi.

Sayyor qabul doirasida bo‘lib o‘tgan jinoyat ishlari bo‘yicha Namangan tumani sudining sayyor sud majlisida ma’muriy organlar tomonidan chiqarilgan qarorlar yuzasidan keltirilgan shikoyatlar ko‘rib chiqilib, arizalar qanoatlantirildi.

KITOB – MA’NAVIYAT KO’ZGUSI

Namangan viloyati sudida “Kitob – ma’naviyat ko‘zgusi” tanlovi o‘tkazildi. Sud tizimida “Korrupsiyasiz soha” loyihasini amalga oshirish doirasida tashkil etilgan mazkur tanlov sudya va sud xodimlarining ma’naviyati va dunyoqarashini yuksaltirish, ular o‘rtasida kitobxonlik madaniyatini keng ommalashtirish, kitob o‘qishga bo‘lgan qiziqish va intilishlarini qo‘llab-quvvatlashga qaratildi.

Mazkur tanlovda Namangan viloyati sudi hamda viloyat ma’muriy sudidan 30 nafar sudya va sud xodimlari ishtirok etdilar.

Tanlovda ishtirokchilarning kitobxonlik madaniyati ikki shart bo‘yicha baholandi. Birinchi shartda sudya va sud xodimlari o‘zbek va jahon adabiyoti yozuvchilari asarlarining mazmun-mohiyati, g‘oyasi va ahamiyatini sharhlab berdilar. Ikkinchi shartda kitobxonlar kommissiya a’zolari tomonidan tuzib chiqilgan savollarga tezkor tarzda javob berish bilan o‘z qobiliyatlarini namoyish etdilar. 

Hakamlar hay’ati tomonidan har bir ishtirokchining badiiy asar haqidagi nutqi, savollarga to‘g‘ri va to‘liq javob berishi adolatli tarzda baholab borildi.

Tanlov g‘oliblari mustaqilligimizning 33 yillik bayram shodiyonalari arafasida e’lon qilinib, viloyat sudining diplom va esdalik sovg‘alari bilan taqdirlanadi.

Skip to content